Nagmalar nagmasy 1

¹Dodaklary bilen, goý, meni öpsün! Çünki şerapdan datlydyr söýgiň!

²Müşki-anbarlaryň neneňsi hoşboý, adyň-da dökülen atyr deý, şonuň üçin gyzlar söýýärler seni.

³Meni özüň bilen alaý, howlugaly. Şazadam meni içki otagyna getirdi. Bile lezzet alarys senden; şerapdanam zyýada wasp ederis yşgyňy; sen olaryň söýgisine mynasyp.

⁴Eý, Iýerusalim gyzlary, garaýagyz-da bolsam, görmegeýdirin, gara men Kedaryň çadyrlary deý, owadan men Süleýmanyň perdeleri deý.

⁵Garaýagyzlygyma bakmaň, gün garaltdy meni. Enemiň ogullary maňa gaharlandylar; üzüm bagyna meni sakçy goýdular, ýöne öz üzüm bagyma bakyp bilmedim.

⁶Eý, köňlümiň aşygy, aýt maňa, Nirede bakýaň süriňi? Günorta çagy olara nirede dynç berýäň? Ýoldaşlaryňyň sürüleriniň ýanynda näme üçin sergezdan zenan dek bolaýyn?

⁷Eý, gözelleriň soltany! Eger bilmeseň, süriniň yzy bilen git, çopanlaryň çadyrynyň ýanynda owlaklaryňy bak.

⁸Fyrownyň arabasyna goşulan baýtala meňzedýärin seni, eý, meniň magşugym!

⁹Şelpeli ýaňaklaryň, hünjüli boýnuň ne gözel!

¹⁰Kümüş düwmeli tylla şelpeler ýasarys saňa.

¹¹Şazadam suprasynda otyrka, nard atyrym hoşboý ysyny saçdy.

¹²Aşygym meniň üçin göwüslerimiň arasynda ýatýan mür bogdajygydyr.

¹³Aşygym meniň üçin Engedi üzüm baglaryndaky hyna gülleriniň çogdamydyr.

¹⁴Sen neneňsi gözel, Söýgüli dildarym, meniň! Sen neneňsi gözel, gögerçin gözlim!

¹⁵Gör, nähili syratly sen, eý, meniň söýgüli ýarym, neneňsi hoşroý sen! Gök maýsalykdyr ýatýan ýerimiz.

¹⁶Kedrdendir diregleri öýmüziň, arçadandyr üçegi.