زبُور 136

¹خُداوند کا شُکر کرو کیونکہ وہ بھلا ہے۔ کہ اُسکی شفقت ابدی ہے۔

²اِلہٰوں کے خُدا کا شُکر کرو۔ کہ اُسکی شفقت ابدی ہے۔

³مالِکوں کے مالِک کا شُکر کرو کہ اُسکی شفقت ابدی ہے۔

⁴اُسکا جو اکیلا بڑے بڑے عجیب کام کرتا ہے۔ کہ اُسکی شفقت ابدی ہے۔

⁵اُسی کا جِس نے دانائی سے آسمان بنایا کہ اُسکی شفقت ابدی ہے۔

⁶اُسی کا جِس نے زمین کو پانی پر پھیلایا۔ کہ اُسکی شفقت ابدی ہے۔

⁷اُسی کا جِس نے بڑے بڑے نیّر بنائے کہ اُسکی شفقت ابدی ہے۔

⁸دِن کو حکومت کرنے کے لئے آفتاب کہ اُسکی شفقت ابدی ہے۔

⁹رات کو حکومت کرنے کے لئے مہتاب اور ستارے کہ اُسکی شفقت ابدی ہے۔

¹⁰اُسی کا ج،س نے مصؔر کے پہلوٹھوں کو مارا۔ کہ اُسکی شفقت ابدی ہے۔

¹¹اور اِسرائؔیل کو اُن میں سے نِکال لایا۔ کہ اُسکی شفقت ابدی ہے۔

¹²قوی ہاتھ اور بلند بازو سے کہ اُسکی شفقت ابدی ہے۔

¹³اُسی کا جِس نے بحرِ قُلزؔم کو دو حصّے کر دیا کہ اُسکی شفقت ابدی ہے۔

¹⁴اور اِسرائؔیل کو اُس میں سے پار کیا کہ اُسکی شفقت ابدی ہے۔

¹⁵لیکن فرعؔون اور اُسکے لشکر کو بحرِ قُلزؔم میں ڈالدیا۔ کہ اُسکی شفقت ابدی ہے۔

¹⁶اُسی کا جو بیابان میں اپنے لوگوں کا راہنما ہُؤا۔ کہ اُسکی شفقت ابدی ہے۔

¹⁷اُسی کا جِس نے بڑے بڑے بادشاہوں کو مارا کہ اُسکی شفقت ابدی ہے۔

¹⁸اور نامور بادشاہوں کو قتل کیا کہ اُسکی شفقت ابدی ہے۔

¹⁹اموریوں کے بادشاہ سیحؔون کہ اُسکی شفقت ابدی ہے۔

²⁰اور بسؔن کے بادشاہ عوؔج کو کہ اُسکی شفقت ابدی ہے۔

²¹اور اُنکی زمین میراث کر دی کہ اُسکی شفقت ابدی ہے۔

²²یعنی اپنے بندہ اِسرائؔیل کی میراث کہ اُسکی شفقت ابدی ہے۔

²³جِس نے ہماری پستی میں ہمکو یاد کیا کہ اُسکی شفقت ابدی ہے۔

²⁴اور ہمارے مخالفوں سے ہمکو چُھڑایا کہ اُسکی شفقت ابدی ہے۔

²⁵جو سب بشر کہ روزی دیتا ہے۔ کہ اُسکی شفقت ابدی ہے۔

²⁶آسمان کے خُدا کا شُکر کرو کیونکہ اُسکی شفقت ابدی ہے۔