Jó 41

¹an extrahere poteris Leviathan hamo et fune ligabis linguam eius

²(40:21) numquid pones circulum in naribus eius et armilla perforabis maxillam eius

³(40:22) numquid multiplicabit ad te preces aut loquetur tibi mollia

⁴(40:23) numquid feriet tecum pactum et accipies eum servum sempiternum

⁵(40:24) numquid inludes ei quasi avi aut ligabis illum ancillis tuis

⁶(40:25) concident eum amici divident illum negotiatores

⁷(40:26) numquid implebis sagenas pelle eius et gurgustium piscium capite illius

⁸(40:27) pone super eum manum tuam memento belli nec ultra addas loqui

⁹(40:28) ecce spes eius frustrabitur eum et videntibus cunctis praecipitabitur

¹⁰(41:1) non quasi crudelis suscitabo eum quis enim resistere potest vultui meo

¹¹(41:2) quis ante dedit mihi ut reddam ei omnia quae sub caelo sunt mea sunt

¹²(41:3) non parcam ei et verbis potentibus et ad deprecandum conpositis

¹³(41:4) quis revelavit faciem indumenti eius et in medium oris eius quis intrabit

¹⁴(41:5) portas vultus eius quis aperiet per gyrum dentium eius formido

¹⁵(41:6) corpus illius quasi scuta fusilia et conpactum squamis se prementibus

¹⁶(41:7) una uni coniungitur et ne spiraculum quidem incedit per eas

¹⁷(41:8) una alteri adherebunt et tenentes se nequaquam separabuntur

¹⁸(41:9) sternutatio eius splendor ignis et oculi eius ut palpebrae diluculi

¹⁹(41:10) de ore eius lampades procedunt sicut taedae ignis accensae

²⁰(41:11) de naribus eius procedit fumus sicut ollae succensae atque ferventis

²¹(41:12) halitus eius prunas ardere facit et flamma de ore eius egreditur

²²(41:13) in collo eius morabitur fortitudo et faciem eius praecedet egestas

²³(41:14) membra carnium eius coherentia sibi mittet contra eum fulmina et ad locum alium non ferentur

²⁴(41:15) cor eius indurabitur quasi lapis et stringetur quasi malleatoris incus

²⁵(41:16) cum sublatus fuerit timebunt angeli et territi purgabuntur

²⁶(41:17) cum adprehenderit eum gladius subsistere non poterit neque hasta neque torax

²⁷(41:18) reputabit enim quasi paleas ferrum et quasi lignum putridum aes

²⁸(41:19) non fugabit eum vir sagittarius in stipulam versi sunt ei lapides fundae

²⁹(41:20) quasi stipulam aestimabit malleum et deridebit vibrantem hastam

³⁰(41:21) sub ipso erunt radii solis sternet sibi aurum quasi lutum

³¹(41:22) fervescere faciet quasi ollam profundum mare ponet quasi cum unguenta bulliunt

³²(41:23) post eum lucebit semita aestimabit abyssum quasi senescentem

³³(41:24) non est super terram potestas quae conparetur ei qui factus est ut nullum timeret

³⁴(41:25) omne sublime videt ipse est rex super universos filios superbiae