Psalmi 102

¹Domine audi orationem meam et clamor meus ad te veniat

²(101:3) ne abscondas faciem tuam a me in die tribulationis meae inclina ad me aurem tuam in quacumque die invocavero velociter exaudi me

³(101:4) quoniam consumpti sunt sicut fumus dies mei et ossa mea quasi frixa contabuerunt

⁴(101:5) percussum est quasi faenum et arefactum est cor meum quia oblitus sum comedere panem meum

⁵(101:6) a voce gemitus mei adhesit os meum carni meae

⁶(101:7) adsimilatus sum pelicano deserti factus sum quasi bubo solitudinum

⁷(101:8) vigilavi et fui sicut avis solitaria super tectum

⁸(101:9) tota die exprobrabant mihi inimici mei exultantes per me iurabant

⁹(101:10) quia cinerem sicut panem comedi et potum meum cum fletu miscui

¹⁰(101:11) a facie indignationis et irae tuae quia elevasti me et adlisisti me

¹¹(101:12) dies mei quasi umbra inclinati sunt et ego quasi faenum arui

¹²(101:13) tu autem Domine in aeternum permanes memoriale tuum in generatione et generatione

¹³(101:14) tu suscitans misereberis Sion quia tempus est ut miserearis eius quoniam venit tempus quoniam venit pactum

¹⁴(101:15) quoniam placitos fecerunt servi tui lapides eius et pulverem eius miserabilem

¹⁵(101:16) et timebunt gentes nomen Domini et universi reges terrae gloriam tuam

¹⁶(101:17) quia aedificavit Dominus Sion apparuit in gloria sua

¹⁷(101:18) respexit ad orationem vacui et non dispexit orationem eorum

¹⁸(101:19) scribatur hoc in generatione novissima et populus qui creabitur laudabit Dominum

¹⁹(101:20) quoniam prospexit de excelso sanctuario suo Dominus de caelo terram contemplatus est

²⁰(101:21) ut audiret gemitum vincti ut solveret filios mortis

²¹(101:22) ut narretur in Sion nomen Domini et laudatio eius in Hierusalem

²²(101:23) cum congregati fuerint populi simul et regna ut serviant Domino

²³(101:24) adflixit in via fortitudinem meam adbreviavit dies meos

²⁴(101:25) dicam Deus meus ne rapias me in dimidio dierum meorum in generatione generationum anni tui

²⁵(101:26) a principio terram fundasti et opus manuum tuarum caeli

²⁶(101:27) ipsi peribunt tu autem stabis et omnes quasi vestimentum adterentur et quasi pallium mutabis illos et mutabuntur

²⁷(101:28) tu autem ipse es et anni tui non deficient

²⁸[101:29] filii servorum tuorum habitabunt et semen eorum ante faciem eorum perseverabit