Psalmi 140

¹erue me Domine ab homine malo a viris iniquis serva me

²(139:3) qui cogitaverunt malitias in corde tota die versati sunt in proeliis

³(139:4) exacuerunt linguam suam quasi serpens venenum aspidis sub labiis eorum semper

⁴(139:5) custodi me Domine de manu impii a viro iniquitatum serva me qui cogitaverunt subplantare gressus meos

⁵(139:6) absconderunt superbi laqueum mihi et funibus extenderunt rete iuxta semitam offendiculum posuerunt mihi semper

⁶(139:7) dixi Domino Deus meus tu audi Domine vocem deprecationis meae

⁷(139:8) Domine Deus fortitudo salutis meae protexisti caput meum in die belli

⁸(139:9) ne des Domine desideria impii scelera eius ne effundantur et eleventur semper

⁹(139:10) amaritudo convivarum meorum labor labiorum eorum operiat eos

¹⁰(139:11) cadent super eos carbones ignis deicies eos in foveas ut non consurgant

¹¹(139:12) vir linguosus non dirigetur in terra virum iniquum mala capient in interitu

¹²(139:13) scio quod faciet Dominus causam inopis iudicia pauperum

¹³[139:14] attamen iusti confitebuntur nomini tuo habitabunt recti cum vultu tuo