Psalmi 38

¹Domine ne in ira tua arguas me neque in furore tuo corripias me

²(37:3) quia sagittae tuae infixae sunt mihi et tetigit me manus tua

³(37:4) non est sanitas in carne mea a facie indignationis tuae non est pax ossibus meis a facie peccati mei

⁴(37:5) quia iniquitates meae transierunt caput meum quasi onus grave adgravatae sunt super me

⁵(37:6) conputruerunt et tabuerunt cicatrices meae a facie insipientiae meae

⁶(37:7) adflictus sum et incurvatus nimis tota die maerens ambulabam

⁷(37:8) quia lumbi mei repleti sunt ignominia et non est sanitas in carne mea

⁸(37:9) evigilavi et adflictus sum nimis rugiebam a gemitu cordis mei

⁹(37:10) Domine in conspectu tuo omne desiderium meum et gemitus meus a te non est absconditus

¹⁰(37:11) cor meum fluctuabat dereliquit me fortitudo mea et lux oculorum meorum etiam ipsa non est mecum

¹¹(37:12) cari mei et amici mei quasi contra lepram meam steterunt et vicini mei longe steterunt

¹²(37:13) et inruebant quaerentes animam meam et investigantes mala mihi loquebantur insidias et dolos tota die meditabantur

¹³(37:14) ego autem quasi surdus non audiebam et quasi mutus non aperiebam os meum

¹⁴(37:15) et eram quasi homo non audiens nec habens in ore suo redargutiones

¹⁵(37:16) te enim Domine expectabam tu exaudies Domine Deus meus

¹⁶(37:17) quia dixi ne forte insultent mihi et cum vacillaverint pedes mei super me magnificentur

¹⁷(37:18) quia ego ad plagas paratus et dolor meus contra me est semper

¹⁸(37:19) quia iniquitatem meam adnuntio sollicitus ero pro peccato meo

¹⁹(37:20) inimici autem mei viventes confortati sunt et multiplicati sunt odientes me mendaciter

²⁰(37:21) et qui reddunt malum pro bono adversabantur mihi quia sequebar bonum

²¹(37:22) ne derelinquas me Domine Deus meus ne elongeris a me

²²(37:23) festina in auxilium meum Domine salutis meae