Psalmi 46

¹Deus nostra spes et fortitudo auxilium in tribulationibus inventus es validum

²(45:3) ideo non timebimus cum fuerit translata terra et concussi montes in corde maris

³(45:4) sonantibus et intumescentibus gurgitibus eius et agitatis montibus in potentia eius semper

⁴(45:5) fluminis divisiones laetificant civitatem Dei sanctum tabernaculum Altissimi

⁵(45:6) Dominus in medio eius non commovebitur auxiliabitur ei Deus in ipso ortu matutino

⁶(45:7) conturbatae sunt gentes concussa sunt regna dedit vocem suam prostrata est terra

⁷(45:8) Dominus exercituum nobiscum protector noster Deus Iacob semper

⁸(45:9) venite et videte opera Domini quantas posuerit solitudines in terra

⁹(45:10) conpescuit bella usque ad extremum terrae arcum confringet et concidet hastam plaustra conburet igni

¹⁰(45:11) cessate et cognoscite quoniam ego sum Deus exaltabor in gentibus exaltabor in terra

¹¹(45:12) Dominus exercituum nobiscum fortitudo nostra Deus Iacob semper