Psalmi 47

¹omnes populi plaudite manibus iubilate Deo in voce laudis

²(46:3) quoniam Dominus altissimus terribilis rex magnus super omnem terram

³(46:4) congregavit populos subter nos et tribus sub pedibus nostris

⁴(46:5) elegit nobis hereditatem nostram gloriam Iacob quam dilexit semper

⁵(46:6) ascendit Deus in iubilo Deus in voce bucinae

⁶(46:7) canite Deo canite canite regi nostro canite

⁷(46:8) quia rex universae terrae Deus canite erudite

⁸(46:9) regnavit Deus super gentes Deus sedet super thronum sanctum suum

⁹(46:10) principes populorum congregati sunt populus Dei Abraham quoniam Dei scuta terrae vehementer elevata sunt