Psalmi 52

¹cum venisset Doec Idumeus et adnuntiasset Saul dicens ei venit David in domum Achimelech(51:3) quid gloriaris in malitia potens misericordia Dei tota est die

²(51:4) insidias cogitat lingua tua quasi novacula acuta faciens dolum

³(51:5) dilexisti malum magis quam bonum mendacium magis quam loqui iustitiam semper

⁴(51:6) dilexisti omnia verba ad devorandum lingua dolosa

⁵(51:7) sed Deus destruet te in sempiternum terrebit et evellet te de tabernaculo et eradicabit te de terra viventium semper

⁶(51:8) videbunt iusti et timebunt et super eum ridebunt

⁷(51:9) ecce vir qui non posuit Deum fortitudinem suam sed speravit in multitudine divitiarum suarum confortatus est in insidiis suis

⁸(51:10) ego sicut oliva virens in domo Dei speravi in misericordia Dei in saeculum sempiternum

⁹(51:11) confitebor tibi in saeculo quoniam fecisti et expectabo nomen tuum quoniam bonum in conspectu sanctorum tuorum