Psalmi 55

¹exaudi Deus orationem meam et ne dispicias deprecationem meam

²(54:3) adtende mihi et exaudi me humiliatus sum in meditatione mea et conturbatus

³(54:4) a voce inimici a facie persequentis impii quoniam proiecerunt super me iniquitatem et in furore adversabantur mihi

⁴(54:5) cor meum doluit in vitalibus meis et terrores mortis ceciderunt super me

⁵(54:6) timor et tremor venit super me et operuit me caligo

⁶(54:7) et dixi quis dabit mihi pinnas columbae ut volem et requiescam

⁷(54:8) ut procul abeam et commorer in deserto semper

⁸(54:9) festinabo ut salver ab spiritu tempestatis et turbinis

⁹(54:10) praecipita Domine divide linguas eorum quoniam vidi iniquitatem et contradictionem in civitate

¹⁰(54:11) die et nocte circumeuntes muros eius scelus et dolorem in medio eius

¹¹(54:12) insidiae in vitalibus eius et non recedet de plateis eius damnum et fraudulentia

¹²(54:13) non enim inimicus exprobravit mihi ut sustineam neque is qui me oderat super me magnificatus est ut abscondar ab eo

¹³(54:14) sed tu homo unianimis meus dux meus et notus meus

¹⁴(54:15) qui simul habuimus dulce secretum in domo Dei ambulavimus in terrore

¹⁵(54:16) veniat mors super eos descendant in infernum viventes quia nequitiae in congregatione eorum et in medio eorum

¹⁶(54:17) ego ad Deum clamabo et Dominus salvabit me

¹⁷(54:18) vespere et mane et meridie eloquar et resonabo et exaudiet vocem meam

¹⁸(54:19) redimet in pace animam meam ab adpropinquantibus mihi multi enim fuerunt adversum me

¹⁹(54:20) exaudiet Deus et humiliabit eos qui iudex est ab initio semper non enim mutantur neque timent Deum

²⁰(54:21) extendit manum suam ad pacifica sua contaminabit pactum suum

²¹(54:22) nitidius butyro os eius pugnat autem cor illius molliores sermones eius oleo cum sint lanceae

²²(54:23) proice super Dominum caritatem tuam et ipse enutriet te non dabit in aeternum fluctuationem iusto

²³(54:24) tu autem Deus deduces eos in puteum interitus viri sanguinum et dolosi non dimidiabunt dies suos ego autem fiduciam habeo tui