Psalmi 68

¹exsurgat Deus et dissipentur inimici eius et fugiant qui oderunt eum a facie eius

²(67:3) sicut deficit fumus deficiant sicut tabescit cera a facie ignis pereant impii a facie Dei

³(67:4) iusti autem laetentur exultent in conspectu Dei et gaudeant in laetitia

⁴(67:5) cantate Deo canite nomini eius praeparate viam ascendenti per deserta in Domino nomen eius et exultate coram eo

⁵(67:6) patri pupillorum et defensori viduarum Deus in habitaculo sancto suo

⁶(67:7) Deus habitare facit solitarios in domo educit vinctos in fortitudine increduli autem habitaverunt in siccitatibus

⁷(67:8) Deus cum egredereris ante populum tuum et ambulares per desertum semper

⁸(67:9) terra commota est et caeli stillaverunt a facie tua Deus hoc est in Sinai a facie Dei Dei Israhel

⁹(67:10) pluviam voluntariam elevasti Deus hereditatem tuam laborantem tu confortasti

¹⁰(67:11) animalia tua habitaverunt in ea praeparasti in bonitate tua pauperi Deus

¹¹(67:12) Domine dabis sermonem adnuntiatricibus fortitudinis plurimae

¹²(67:13) reges exercituum foederabuntur foederabuntur et pulchritudo domus dividet spolia

¹³(67:14) si dormieritis inter medios terminos pinnae columbae deargentatae et posteriora eius in virore auri

¹⁴(67:15) cum divideret Robustissimus reges in ea nive dealbata est in Selmon

¹⁵(67:16) mons Dei mons pinguis mons excelsus mons pinguis

¹⁶(67:17) quare contenditis montes excelsi adversum montem quem dilexit Deus ut habitaret in eo siquidem Dominus habitabit semper

¹⁷(67:18) currus Dei innumerabilis milia abundantium Dominus in eis in Sina in sancto

¹⁸(67:19) ascendisti in excelsum captivam duxisti captivitatem accepisti dona in hominibus insuper et non credentes habitare Dominum Deum

¹⁹(67:20) benedictus Dominus per singulos dies portabit nos Deus salutis nostrae semper

²⁰(67:21) Deus noster Deus salutis et Domini Dei mortis egressus

²¹(67:22) verumtamen Deus confringet capita inimicorum suorum verticem crinis ambulantis in delictis suis

²²(67:23) dixit Dominus de Basan convertam convertam de profundis maris

²³(67:24) ut calcet pes tuus in sanguine lingua canum tuorum ex inimicis a temet ipso

²⁴(67:25) viderunt itinera tua Deus itinera Dei mei regis mei in sancto

²⁵(67:26) praecesserunt cantores eos qui post tergum psallebant in medio puellarum tympanistriarum

²⁶(67:27) in ecclesiis benedicite Deo Domino de fontibus Israhel

²⁷(67:28) ibi Beniamin parvulus continens eos principes Iuda in purpura sua principes Zabulon principes Nepthali

²⁸(67:29) praecepit Deus tuus de fortitudine tua conforta Deus hoc quod operatus es nobis

²⁹(67:30) de templo tuo quod est in Hierusalem tibi offerent reges munera

³⁰(67:31) increpa bestiam calami congregatio fortium in vitulis populorum calcitrantium contra rotas argenteas disperge populos qui bella volunt

³¹(67:32) offerant velociter ex Aegypto Aethiopia festinet dare manus Deo

³²(67:33) regna terrae cantate Deo canite Domino semper

³³(67:34) qui ascendit super caelum caeli a principio ecce dabit voci suae vocem fortitudinis

³⁴(67:35) date gloriam Deo super Israhel magnificentia eius et fortitudo eius in caelis

³⁵(67:36) terribilis Deus de sanctuario suo Deus Israhel ipse dabit fortitudinem et robur populo benedictus Deus