Psalmi 69

¹salva me Deus quoniam venerunt aquae usque ad animam

²(68:3) infixus sum in limo profundi et non possum consistere veni in profundum aquarum et flumen operuit me

³(68:4) laboravi clamans exasperatum est guttur meum defecerunt oculi mei expectantes Deum meum

⁴(68:5) multiplicati sunt super capillos capitis mei qui oderunt me gratis confortati sunt qui persequebantur me inimici mei iniuste quae non rapueram tunc reddebam

⁵(68:6) Deus tu scis stultitiam meam et peccata mea a te non sunt abscondita

⁶(68:7) non confundantur in me qui expectant te Domine Deus exercituum non confundantur in me qui quaerunt te Deus Israhel

⁷(68:8) quia propter te portavi obprobrium operuit confusio faciem meam

⁸(68:9) alienus factus sum fratribus meis et peregrinus filiis matris meae

⁹(68:10) quia zelus domus tuae comedit me et obprobrium exprobrantium tibi cecidit super me

¹⁰(68:11) et flevi in ieiunio animam meam et factum est in obprobria mihi

¹¹(68:12) et posui vestimentum meum saccum et factus sum eis in parabulam

¹²(68:13) contra me loquebantur qui sedebant in porta et cantabant bibentes vinum

¹³(68:14) mea autem oratio ad te Domine tempus reconciliationis est Deus in multitudine misericordiae tuae exaudi me in veritate salutaris tui

¹⁴(68:15) erue me de luto ut non infigar libera me ab his qui oderunt me et de profundis aquis

¹⁵(68:16) ne operiat me fluvius aquae et ne absorbeat me profundum et non coronet super me puteus os suum

¹⁶(68:17) exaudi me Domine quoniam bona est misericordia tua secundum multitudinem miserationum tuarum respice ad me

¹⁷(68:18) et ne abscondas faciem tuam a servo tuo quoniam tribulor cito exaudi me

¹⁸(68:19) accede ad animam meam redime eam propter inimicos meos libera me

¹⁹(68:20) tu scis obprobrium meum et confusionem meam et ignominiam meam

²⁰(68:21) coram te sunt omnes hostes mei obprobrio contritum est cor meum et desperatus sum et expectavi qui contristaretur et non fuit et qui consolaretur et non inveni

²¹(68:22) et dederunt in esca mea fel et in siti mea potaverunt me aceto

²²(68:23) sit mensa eorum coram eis in laqueum et in retributiones ad corruendum

²³(68:24) contenebrentur oculi eorum ne videant et dorsum eorum semper incurva

²⁴(68:25) effunde super eos indignationem tuam et ira furoris tui conprehendat eos

²⁵(68:26) fiat commoratio eorum deserta in tabernaculis eorum non sit qui habitet

²⁶(68:27) quoniam quem tu percussisti persecuti sunt et ut adfligerent vulneratos tuos narrabant

²⁷(68:28) da iniquitatem super iniquitatem eorum et non veniant in iustitia tua

²⁸(68:29) deleantur de libro viventium et cum iustis non scribantur

²⁹(68:30) ego autem pauper et dolens salus tua Deus suscipiet me

³⁰(68:31) laudabo nomen Dei in cantico et magnificabo eum in confessione

³¹(68:32) et placebit Domino super vitulum novellum cornua efferentem et ungulas

³²(68:33) videntes mansueti laetabuntur qui quaeritis Deum vivet anima vestra

³³(68:34) quoniam exaudivit pauperes Dominus et vinctos suos non dispexit

³⁴(68:35) laudent eum caeli et terra maria et omne quod movetur in eis

³⁵(68:36) quia Deus salvabit Sion et aedificabit civitates Iuda et habitabunt ibi et possidebunt eam

³⁶(68:37) et semen servorum eius possidebit eam et qui diligunt nomen eius habitabunt in ea