Psalmi 85

¹victori filiorum Core canticum(84:2) placatus es Domine terrae tuae reduxisti captivitatem Iacob

²(84:3) dimisisti iniquitatem populo tuo operuisti omnes iniquitates eorum semper

³(84:4) continuisti omnem indignationem tuam conversus es ab ira furoris tui

⁴(84:5) converte nos Deus Iesus noster et solve iram tuam adversum nos

⁵(84:6) noli in aeternum irasci nobis extendens iram tuam in generationem et generationem

⁶(84:7) nonne tu revertens vivificabis nos et populus tuus laetabitur in te

⁷(84:8) ostende nobis Domine misericordiam tuam et salutare tuum da nobis

⁸(84:9) audiam quid loquatur Dominus Deus loquetur enim pacem ad populum suum et ad sanctos suos ut non convertantur ad stultitiam

⁹(84:10) verumtamen prope est his qui timent eum salutare eius ut habitet gloria in terra nostra

¹⁰(84:11) misericordia et veritas occurrerunt iustitia et pax deosculatae sunt

¹¹(84:12) veritas de terra orta est et iustitia de caelo prospexit

¹²(84:13) sed et Dominus dabit bonum et terra nostra dabit germen suum

¹³(84:14) iustitia ante eum ibit et ponet in via gressus suos