Psalmi 88

¹Domine Deus salutis meae per diem clamavi in nocte coram te

²(87:3) ingrediatur ante te oratio mea inclina aurem tuam ad laudationem meam

³(87:4) quia repleta est malis anima mea et vita mea ad infernum descendit

⁴(87:5) reputatus sum cum descendentibus lacum factus sum quasi homo invalidus

⁵(87:6) inter mortuos liber sicut interfecti et dormientes in sepulchro quorum non recordaris amplius et qui a manu tua abscisi sunt

⁶(87:7) posuisti me in lacu novissimo in tenebris in profundis

⁷(87:8) super me confirmatus est furor tuus et cunctis fluctibus tuis adflixisti me semper

⁸(87:9) longe fecisti notos meos a me posuisti me abominationem eis clausum et non prodeuntem

⁹(87:10) oculus meus infirmatus est ab adflictione invocavi te Domine tota die expandi ad te palmas meas

¹⁰(87:11) numquid mortuis facies mirabilia aut gigantes surgent et confitebuntur tibi semper

¹¹(87:12) numquid narrabitur in sepulchro misericordia tua et veritas tua in perditione

¹²(87:13) numquid noscentur in tenebris mirabilia tua et iustitia tua in terra quae oblivioni tradita est

¹³(87:14) ego autem ad te Domine clamavi et mane oratio mea praeveniet te

¹⁴(87:15) quare Domine abicis animam meam abscondis faciem tuam a me

¹⁵(87:16) pauper ego et aerumnosus ab adulescentia portavi furorem tuum et conturbatus sum

¹⁶(87:17) per me transierunt irae tuae terrores tui oppresserunt me

¹⁷(87:18) circumdederunt me quasi aquae tota die vallaverunt me pariter

¹⁸(87:19) longe fecisti a me amicum et sodalem notos meos abstulisti