Psalmi 89

¹misericordias Domini in aeternum cantabo in generatione et generatione adnuntiabo veritatem tuam in ore meo

²(88:3) quia dixisti sempiterna misericordia aedificabitur caelos fundabis et veritas tua in eis

³(88:4) percussi foedus cum electo meo iuravi David servo meo

⁴(88:5) usque in aeternum stabiliam semen tuum et aedificabo in generationem et generationem thronum tuum semper

⁵(88:6) confitebuntur caeli mirabilia tua Domine et veritatem tuam in ecclesia sanctorum

⁶(88:7) quis enim in nubibus adaequabitur Domino adsimilabitur Domino de filiis Dei

⁷(88:8) Deus inclitus in arcano sanctorum nimio et terribilis in cunctis qui circum eum sunt

⁸(88:9) Domine Deus exercituum quis similis tui fortissime Domine et veritas tua in circuitu tuo

⁹(88:10) tu dominaris superbiae maris et elationes gurgitum eius tu conprimis

¹⁰(88:11) tu confregisti quasi vulneratum superbum in brachio forti tuo dispersisti inimicos tuos

¹¹(88:12) tui sunt caeli et tua est terra orbem et plenitudinem eius tu fundasti

¹²(88:13) aquilonem et dexteram tu creasti Thabor et Hermon nomen tuum laudabunt

¹³(88:14) tuum brachium cum fortitudine roboretur manus tua exaltetur dextera tua

¹⁴(88:15) iustitia et iudicium firmamentum throni tui misericordia et veritas praecedent faciem tuam

¹⁵(88:16) beatus populus qui novit iubilum Domine in lumine vultus tui ambulabunt

¹⁶(88:17) in nomine tuo exultabunt tota die et in iustitia tua exaltabuntur

¹⁷(88:18) quia gloria fortitudinis eorum tu es et in misericordia tua elevabis cornu nostrum

¹⁸(88:19) quia a Domino est protectio nostra et a Sancto Israhel rege nostro

¹⁹(88:20) tunc locutus es per visionem sanctis tuis et dixisti posui adiutorium super robustum exaltavi electum de populo

²⁰(88:21) inveni David servum meum oleo sancto meo unxi eum

²¹(88:22) cum quo manus mea firma erit et brachium meum roborabit eum

²²(88:23) non decipiet inimicus eum et filius iniquitatis non adfliget eum

²³(88:24) sed concidam ante faciem eius hostes illius et qui eum oderunt percutiam

²⁴(88:25) veritas autem mea et misericordia mea erit cum eo et in nomine meo exaltabitur cornu eius

²⁵(88:26) et ponam in mari manum eius et in fluminibus dexteram eius

²⁶(88:27) ipse vocabit me pater meus es tu Deus meus et fortitudo salutis meae

²⁷(88:28) ego autem primogenitum ponam eum excelsum regibus terrae

²⁸(88:29) in aeternum custodiam ei misericordiam meam et pactum meum fidele ei erit

²⁹(88:30) et ponam perpetuum semen eius et thronum eius sicut dies caeli

³⁰(88:31) si autem dereliquerint filii eius legem meam et in iudiciis meis non ambulaverint

³¹(88:32) si caerimonias meas profanaverint et praecepta mea non custodierint

³²(88:33) visitabo in virga scelera eorum et in plagis iniquitatem eorum

³³(88:34) misericordiam autem meam non auferam ab eo nec mentiar in veritate mea

³⁴(88:35) non violabo pactum meum et quod egressum est de labiis meis non mutabo

³⁵(88:36) semel iuravi in sancto meo ne David mentiar

³⁶(88:37) semen eius in sempiternum erit

³⁷(88:38) et thronus eius sicut sol in conspectu meo sicut luna stabilietur in sempiternum et testis in caelo fidelis semper

³⁸(88:39) tu autem reppulisti et proiecisti iratus es adversum christum tuum

³⁹(88:40) adtenuasti pactum servi tui profanasti in terra diadema eius

⁴⁰(88:41) dissipasti omnes macerias eius posuisti munitiones eius pavorem

⁴¹(88:42) diripuerunt eum omnes qui transeunt per viam factus est obprobrium vicinis suis

⁴²(88:43) elevasti dexteram hostium eius laetificasti omnes inimicos illius

⁴³(88:44) avertisti robur gladii eius et non sublevasti eum in proelio

⁴⁴(88:45) quiescere fecisti munditiam eius et thronum illius in terram detraxisti

⁴⁵(88:46) adbreviasti dies adulescentiae eius operuisti eum ignominia sempiterna

⁴⁶(88:47) usquequo Domine absconderis in finem succendetur quasi ignis indignatio tua

⁴⁷(88:48) memento mei de profundo alioquin quare frustra creasti filios hominum

⁴⁸(88:49) quis est vir qui vivat et non videat mortem salvans animam suam de manu inferi semper

⁴⁹(88:50) ubi sunt misericordiae tuae antiquae Domine quas iurasti David in veritate tua

⁵⁰(88:51) recordare Domine obprobrii servorum tuorum quia portavi in sinu meo omnes iniquitates populorum

⁵¹(88:52) quas exprobraverunt inimici tui Domine quibus exprobraverunt vestigia christi tui

⁵²(88:53) benedictus Dominus in sempiternum amen et amen