Canticum Canticorum 1

²(1:1) osculetur me osculo oris sui quia meliora sunt ubera tua vino

³(1:2) fraglantia unguentis optimis oleum effusum nomen tuum ideo adulescentulae dilexerunt te

⁴(1:3) trahe me post te curremus introduxit me rex in cellaria sua exultabimus et laetabimur in te memores uberum tuorum super vinum recti diligunt te

⁵(1:4) nigra sum sed formonsa filiae Hierusalem sicut tabernacula Cedar sicut pelles Salomonis

⁶(1:5) nolite me considerare quod fusca sim quia decoloravit me sol filii matris meae pugnaverunt contra me posuerunt me custodem in vineis vineam meam non custodivi

⁷(1:6) indica mihi quem diligit anima mea ubi pascas ubi cubes in meridie ne vagari incipiam per greges sodalium tuorum

⁸(1:7) si ignoras te o pulchra inter mulieres egredere et abi post vestigia gregum et pasce hedos tuos iuxta tabernacula pastorum

⁹(1:8) equitatui meo in curribus Pharaonis adsimilavi te amica mea

¹⁰(1:9) pulchrae sunt genae tuae sicut turturis collum tuum sicut monilia

¹¹(1:10) murenulas aureas faciemus tibi vermiculatas argento

¹²(1:11) dum esset rex in accubitu suo nardus mea dedit odorem suum

¹³(1:12) fasciculus murrae dilectus meus mihi inter ubera mea commorabitur

¹⁴(1:13) botrus cypri dilectus meus mihi in vineis Engaddi

¹⁵(1:14) ecce tu pulchra es amica mea ecce tu pulchra oculi tui columbarum

¹⁶(1:15) ecce tu pulcher es dilecte mi et decorus lectulus noster floridus

¹⁷(1:16) tigna domorum nostrarum cedrina laquearia nostra cypressina