UYobhi 5

¹Khawubize kambe, ukuba ukho na owokuphendula. Uya kubheka kuwuphi na kwabangcwele?

²Kuba ingqumbo iyambulala osisimathane, Nekhwele liyambulala osisiyatha.

³Ndimbonile mna osisimathane emila; Ndaza ndalishwabulela ngesiquphe ikhaya lakhe.

⁴Bakude nosindiso abantwana bakhe, Batyunyuzwa esangweni bengenamhlanguli;

⁵Ekubeni abalambileyo besidla uvuno lwakhe, Balurhole naseluthangweni lwesiphingo; Abanxaniweyo bazonda ubutyebi babo.

⁶Kuba inkohlakalo ayiphumi eluthulini, Nobubi abuntshuli emhlabeni;

⁷Hayi, umntu uzalelwa ububi, Njengokuba iintlantsi zinyuka ukubaleka kwazo.

⁸Ke mna bendiya kusingisa kuThixo, Indawo yam ndiyibhekise kuThixo,

⁹Owenza izinto ezinkulu ezingenakugocwagocwa, Imisebenzi ebalulekileyo engenakubalwa;

¹⁰Ulonika imvula phezu kobuso bomhlaba, Ase amanzi phezu kwamaphandle,

¹¹Ukuba abathobekileyo abamise ezindaweni eziphakamileyo, Abanezimnyama zokuzila banyukele elusindisweni.

¹²Utshitshisa iingcinga zabo banobuqhophololo, Zingenzi nto izimasekileyo izandla zabo.

¹³Ubambisa izilumko kubuqhophololo bazo, Iqhinga labanobuqokolo lingxamiseke ke.

¹⁴Emini baqubisana nobumnyama, Baphuthaphuthe kwemaqanda, ngathi kusebusuku.

¹⁵Usindisa ihlwempu ekreleni, emlonyeni wabo, Nasesandleni sowomeleleyo.

¹⁶Kubekho ke ithemba kosweleyo, Ubugqwetha buwuvale umlomo wabo.

¹⁷Yabona, unoyolo mntu owohlwaywa nguThixo! Musa ke ukukucekisa ukuthethisa kukaSomandla!

¹⁸Kuba wenza buhlungu, abophe; Uyaphalusa, ziphilise izandla zakhe.

¹⁹Ezimbandezelweni ezintandathu uya kukuhlangula, Nakwezisixhenxe akuyi kuchukunyiswa bububi;

²⁰Endlaleni ukukhulula ekufeni Emfazweni ukukhulula ekuxatyelweni ngekrele,

²¹Eziniyeni yolwimi uzinyezwe, Ungoyiki imbuqo, yakufika.

²²Imbuqo nendlala uya kuyihleka, Nerhamncwa lasendle ungaloyiki.

²³Kuba unqophisene namatye asendle, Amarhamncwa asendle axolelene nawe;

²⁴Uya kwazi ukuba uxolo yintente yakho, Ulivelele ikhaya lakho, ungaphosani nanto;

²⁵Uyazi ukuba ininzi imbewu yakho, Nenzala yakho injengomfuno wehlabathi.

²⁶Uya kungena engcwabeni womelele, Njengokungeniswa kwesithungu ngexesha laso.

²⁷Bona, oku sikugocagocile, kunjalo; Kuve, ukwazi wena ngokwakho.