UYobhi 6

¹Waphendula uYobhi, wathi,

²Akwaba bekulinganiswe nokulinganiswa ukukhathazeka kwam, Kwabekwa esikalini ukweyela kwam ndawonye nako!

³Kuba ngoku bekuya kuba nzima ngaphezu kwentlabathi yolwandle; Kungenxa yoko le nto amazwi am angawokubhuda.

⁴Kuba iintolo zoSomandla zimi kum, Ezibuhlungu bazo buwufincayo umoya wam; Izidandathekiso zikaThixo zindakhele uluhlu lokulwa.

⁵Iesile lasendle likhe lilile na liseluhlazeni? Iyalila na inkomo isekutyeni kwayo?

⁶Iyadliwa na into ejavujavu, ingenatyuwa? Sikho na isongo kwintlaka yeqanda?

⁷Eyona nto walayo ukuyiphatha umphefumlo wam, Leyo yeyona ikukudla kwam okukruqulayo.

⁸Akwaba bendingazuza isicelo sam, UThixo andiphe endikulindelayo;

⁹Kukholeke kuThixo ukundityumza, Asivulele isandla sakhe, andinqumle!

¹⁰Ibiya kuhlala ikho intuthuzelo yam; Bendiya kuxhina kwezo ntlungu zingacongiyo; Kuba andiwakhanyelanga amazwi oyiNgcwele.

¹¹Ayintoni na amandla am, ukuba ndingade ndithembe? Siyintoni na isiphelo sam, ukuba ndingade ndibe nokuzeka kade?

¹²Angamandla amatye na amandla am? Inyama yam ilubhedu na?

¹³Akuphelile yini na kum ukuncedakala, Ukuzimaseka kwabhejethwa kwakanye?

¹⁴Akuhlaziswa oqotyiweyo ngummelwane wakhe, Uya kulahla ukumoyika uSomandla.

¹⁵Abazalwana bam banginizile njengomlanjana, Njengomphantsi wemilanjana etshayo,

¹⁶Emdaka ngumkhenkce, Elizifihla kuyo ikhephu.

¹⁷Ekufikeni kokufudumala iyabhanga; Lakubalela ithi qoko, ingabikho ezindaweni zayo.

¹⁸Iyajikajika imendo yokuhamba kwayo, Inyuka iye enyanyeni, idake.

¹⁹Imikhoko yakwaTema yabheka, Imiqodi yakwaShebha yathemba yona;

²⁰Yadana, kuba ibikholosile; Yafika khona, yaneentloni.

²¹Kuba ngoku nisuke naba yinto engento, Nibone ukuqhiphuka umbilini, noyika.

²²Khe ndatsho na ukuthi, Etheni kum? Ndipheni emandleni enu?

²³Nindisindise esandleni sombandezeli, Nindikhulule esandleni sengqwangangqwili?

²⁴Ndiyaleni, ndothi cwaka; Nindiqondise ukulahleka kwam.

²⁵Asikuko nokuba ayahlaba amazwi athe tye! Ke ukohlwaya kwenu kohlwaya ntoni na?

²⁶Niba ninokohlwaya ukuthetha oku na? Angumoya amazwi omntu oncamileyo.

²⁷Ke nangenkedama ningaqashisa, Nirhwebe ngommelwane wenu.

²⁸Makukholeke kuni ngoku, nibheke kum, Kuba okunene ebusweni benu andiyi kuthetha amanga.

²⁹Khanibuye, makungabikho bugqwetha, Niphinde nibuye; ubulungisa bam bukule nto.

³⁰Bukho na ubugqwetha elulwimini lwam? Ikhuhlangubo lam alingekuqondi na ukweyelisela?