Psalms 45

¹My hart word bewoë deur goeie woorde; ek dra my gedigte voor aangaande ‘n Koning; my tong is die pen van ‘n vaardige skrywer.

²(45:3) U is veel skoner as die mensekinders; genade is uitgestort op u lippe; daarom het God U geseën vir ewig.

³(45:4) Gord u swaard aan die heup, o held, u majesteit en u heerlikheid;

⁴(45:5) ja, u heerlikheid! Ry voorspoedig ter wille van waarheid en ootmoed en geregtigheid; en laat u regterhand U vreeslike dinge leer!

⁵(45:6) U pyle is skerp (volke val onder U!); hulle tref in die hart van die Koning se vyande.

⁶(45:7) U troon, o God, is vir ewig en altyd; die septer van u koninkryk is ‘n regverdige septer.

⁷(45:8) U het geregtigheid lief en haat goddeloosheid. Daarom het, o God, u God U gesalf met vreugde-olie bo u metgeselle.

⁸(45:9) Al u klere is mirre en alewee en kassie; uit ivoorpaleise maak snarespel U bly.

⁹(45:10) Dogters van konings is onder u staatsdogters; die koningin staan aan u regterhand in goud van Ofir.

¹⁰(45:11) Hoor, o dogter, en kyk en neig u oor, en vergeet u volk en die huis van u vader;

¹¹(45:12) en as die Koning u skoonheid begeer—want Hy is u Heer—buig u dan voor Hom neer.

¹²(45:13) En, o dogter van Tirus—met geskenke sal hulle u guns soek, ja, die rykstes van die mense.

¹³(45:14) Louter heerlikheid is die Koning se dogter daarbinne; van gouddraad is haar kleding.

¹⁴(45:15) In veelkleurige gewade word sy na die Koning gelei; jonkvroue agter haar, haar vriendinne, word na U gebring.

¹⁵(45:16) Hulle word gelei met vreugde en gejuig; hulle gaan in die Koning se paleis in.

¹⁶(45:17) In die plek van u vaders sal u seuns wees; U sal hulle aanstel as vorste in die hele land.

¹⁷(45:18) U Naam wil ek vermeld van geslag tot geslag; daarom sal die volke U loof vir ewig en altyd.