[5] Vakarua 16

¹"Mo ni maroroya na vula o Epipi ka vakayacora na lako sivia vei Jiova na nomuni Kalou, ni vula o Epipi sa kauti kemuni tani kina mai Ijipita o Jiova na nomuni Kalou ena bogi.

²"Mo ni qai vakacabora kina na lako sivia vei Jiova na nomuni Kalou na veika mai na nomuni loma ni bai kei na vei sipi mai na qele ni sipi ena vanua sa digitaka o Koya me tiko kina na yavana.

³"Mo ni kua ni kania na madrai sa tu kina na leveni me vitu na siga mo ni kania kina na madrai sa sega ni vakaleveni kei na madrai ni rarawa, (ni kemuni sa lako tani mai vakatotolo mai Ijipita), mo ni nanuma ena veisiga kecega o ni sa bula kina ena nomuni lako tani mai Ijipita.

⁴"Me kua ni dua na ka vakaleveni, me kune ena kemuni maliwa ena loma ni vitu na siga, se me dua na leweni manumanu sa vakacabori mai na matai ni siga, me tiko vulagi me yacova na siga ka tarava.

⁵"Mo ni kua ni vakacabora na lako sivia ena nomuni loma ni bai sa solia veikemuni o Jiova na nomuni Kalou;

⁶"Ena vanua ga se digitaka o Jiova me tiko kina na yacana, mo ni vakacabora na lako sivia mai kea, ena gauna sa dromu kina na matanisiga, na gauna ka o ni sa lako tani kina mai Ijipita.

⁷"Mo ni tavuna ka kania ena vanua sa digitaki o Jiova na Kalou, ena mataka mo ni qai tucake ka dui gole ki na nomuni vale laca.

⁸"Me ono na siga mo ni kania na madrai sa sega ni vakaleveni, ena i ka vitu ni siga me qai dua nai soqosoqo tabu ki vua na Kalou. Me kua ni dua e cakacaka kina.

⁹"Mo ni wilika e vitu na macawa vei kemuni; tekivu ena i ka vitu ni macawa, mai na gauna sa tekivu musuki kina na sila ena i sele takelo.

¹⁰"Mo ni maroroya na Solevu ni veimacawa kivei Jiova na nomuni Kalou me sala vata na soli ka me vaka sa yalomuni kina mai na ligamuni, mo ni na solia me vaka sa vakasaututaki Kemuni kina o Jiova na nomuni Kalou.

¹¹"Mo ni reki vakalevu tiko ena matai Jiova na nomuni Kalou kei ira na luvemuni tagane kei na yalewa, kei ira na nomuni dau ni veiqaravi tagane kei na yalewa, kei ira na Livai ena nomuni lomanibai, kei ira na vulagi, na sega ni vakatamani kei ira na yada era sa tiko vata kei Kemuni ena vanua sa digitaka na Kalou o Jiova me tiko kina na yacana.

¹²"Mo ni kila ka vakananuma ga, ni o ni a tiko vakabobula mai Ijipita, mo ni qarauna kina mo ni maroroya ka qarava nai lesilesi oqo.

¹³"Mo ni qarava na solevu ni valevakacevaceva me vitu na siga, ni kemuni sa soqona mai na veika mai na vanua ni butu sila kei na veika mai na i vurevure ni waini.

¹⁴"Mo ni rekitaka na solevu oqo kei ira na luvemuni tagane kei na yalewa kei ira na nomuni dauniveiqaravi tagane kei na yalewa, kei ira na Livai na vulagi kei ira sa sega na tamadra kei na yada era sa tiko ena loma ni nomuni bai.

¹⁵"Me vitu na siga mo ni maroroya na solevu tabu oqo ki vua na Kalou o Jiova ena vanua sa digitaka o Koya, baleta ni Kalou o Jiova ena vakasaututaka na nomuni vuata kecega kei na veicakacaka kecega ni ligamuni, mo ni reki dina tiko kina.

¹⁶"Me vakatolu ena dua na yabaki, me ra rairai kece na nomuni tagane ena matai Jiova na nomuni Kalou ena vanua sa digitaka o koya: Ena solevu ni Madrai Sega ni vakaleveni, ena solevu ni Veimacawaena kei na Solevu ni Valevakacevaceva; sa tabu ni dua e lako liga lala mai ena mata ni Kalou.

¹⁷"Me ra solia na tagane yadua me vaka sa rawata o koya, me vaka na veivakasaututaki sa solia vei kemuni o Jiova na nomuni Kalou. Me Soli Na Lewa Ni Cakacaka Vakadodonu

¹⁸"Mo ni digitaka na daunilewa kei ira mera cakacaka vata ena nomuni matamata kece, sa solia vei kemuni o Jiova na nomuni Kalou, me vaka na nomuni dui yavusa ka me ra lewa vei ira na tamata ena lewa dodonu.

¹⁹"Me kua ni vakavevei na lewa, me kua na veitovaki, se me caka tiko na veivakaqumi, na veivakaqumi e vakamatabokotaka na tamata yalomatua, e moica ka vakavevea talega na vosa dina ka dodonu.

²⁰"Mo ni muria na ka kecega e dina ka dodonu, me rawa ni o ni bula ka taukena na vanua sa solia vei kemuni o Jiova na nomuni Kalou.

²¹"Mo ni kua ni tea e dua na vunikau me nomuni, me vaka e dua na kau mei vakarakarakara, volekata nai cabocabo ni soro o ni sa tara vua na Kalou o Jiova me nomuni.

²²"Mo ni kua ni vakaduria e so na duru tabu, me vaka ni sa cata sara na Kalou o Jiova.