[5] Vakarua 17

¹"Mo ni kua ni vakacabora vei Jiova na nomuni Kalou e dua na bulumakau se sipi sa ca tu se sa tauvimate tu, ni sa ka vakasisila sara vei Jiova na nomuni Kalou na veika vakaoqori.

²"Kevaka sa kune e dua veikemuni ena loma ni nomuni bai sa solia veikemuni o Jiova na nomuni Kalou, e dua na tagane se yalewa sa valavala vakasisila vakalevu ena mata i Jiova na nomuni Kalou ni sa basuka na Nona veiyalayalati,

³"O koya sa lako me qaravi ira ka lotu vei ira na Kalou tani, se na vula se na matanisiga se dua na ka sa tu mai lomalagi au sa sega ni vakarota,

⁴"E sa mai tukuni, ka o ni sa rogoca mo ni qai vakataroga vakavinaka sara, ke vaka sa ka vakaidina ni sa caka na ka vakasisila oqo e Isireli,

⁵"Me qai kau mai na tagane se yalewa sa cakava na ka oqo ena matamata ni koro, me qai vakaviriki ena vatu na tamata o ya me mate sara.

⁶"O koya sa dodonu sara me mate, me vakamatei sara ni sa tiko nai vakadinadina, me rua se tolu, ia, me kua ni vakamatei kevaka e dua ga nai vakadinadina.

⁷"Na ligadra nai vakadinadina me liu sara ga vei koya sa dodonu me vakamatei ka qai muri na ligadra na tamata kecega. Mo ni biuti ira tani na tamata ca mai na kemuni maliwa.

⁸"Kevaka sa basika vei kemuni e dua na ka sa dredre mo ni vakatulewa kina, na vakadave dra, na veilewa sa vakatauci oti, se me baleta na veivakatotogitaki, na veika e dauveibataki ena nomuni matamata, mo ni qai tucake ka lako ki na vanua sa digitaka o Jiova na nomuni Kalou,

⁹"Mo ni qai lako mai vei ira na bete, na Livai kei ira, era na vakatauca mai na i totogi vakadodonu.

¹⁰"E dodonu mo ni cakava vakakina me vaka na lewa era sa vakatauca ena vanua sa digitaka o Jiova. Mo ni qai cakava vakavinaka me vaka era sa vakatauca vei kemuni.

¹¹"Me vaka na totogi sa volai ena vunau, o ni sa vakaroti kina, me vaka na lewa sa vakatauci, mo ni cakava ga; mo ni kua ni vuki ki nai matau se ki nai mawi mai nai totogi sa vakatauci vei kemuni.

¹²"Na tamata sa cakacaka vakaviavialevu ka sa sega ni via rogoci ira na bete, o ira sa cakacaka ena vuku ni Kalou, se vei ira na daunilewai, me mate na tamata o ya. Mo ni qai kauti ira tani na tamata ca oqori mai Isireli.

¹³"Me ra rogoca kece na tamata ka rere ka me kua tale na cakacaka vakaveitalia.

¹⁴"Ni kemuni sa lako mai ki na vanua sa solia vei kemuni o Jiova na nomuni Kalou ka taukena ka tiko talega kina, o ni qai tukuna, 'Keimami na bulia e dua na tui me vakataki ira na veimatanitu era sa tu oqo.'

¹⁵"Mo ni vakatura vakaidina e dua me tui me vaka e dua sa digitaka o Jiova, e dua ga mai vei ira na tacimuni, mo ni bulia me tui, me kua ni tui e dua na vulagi, o koya sa sega ni tacimu.

¹⁶"Me kua ni dua e dauvakalevutaka ga vakai koya na nona ose, se me dua e kauti ira lesu na tamata ki Ijipita me ra laki vakalevutaki ose mai ni sa tukuna oti vei kemuni o Jiova, 'Ni sa sega ni dodonu mo ni muria tale.'

¹⁷"Sa sega ni dodonu me vakalevutaka vei koya na watina de qai vuki tani na yalona; sa vakatalega kina, me kua ni vakalevutaka vei koya na siliva se koula, de qai vuki tani na yalona.

¹⁸"Ni sa dabe tiko ena i dabedabe vakatui ni nona matanitu, ena qai vola, me nona ga, e dua nai lavelave ni vunau oqo mai na kena sa tiko vei ira na bete kei na Livai.

¹⁹"Me tiko ga vei koya, ka me wilika tiko ena veisiga kece sa bula kina, me rawa ni vulica kina me rerevaka na Kalou o Jiova ka muria na vosa kece ni vunau kei nai lesilesi,

²⁰"Me kua ni viavialevu kina na yalona mai vei ira na tacina, me kua ni vuki tani mai nai vakaro kece, se ki nai matau se ki nai mawi, me rawa ni balavu kina na nona bula ena nona matanitu, o koya kei ira na luvena ena kedra maliwa na Isireli.