[1] Vakatekivu 30

¹Ni sa raica o Raijeli ni sa sega tiko ni vakaluveni vei Jekope, sa vuvutaki tuakana vakalevu, sa tukuna vei Jekope, "Solia vei au e dua na gone, de'u na qai mate!"

²Sa cudru vakalevu o Jekope ena vuku i Raijeli, sa tukuna kina, "O au beka na Kalou ni o Koya ga e lewa na vakaluveni, ni o Koya ga e sogota tiko na nomu bola ni gone?"

³Sa tukuna mai o Raijeli, "Oqo o Bila na noqu dauveiqaravi, vakacurumi iko vua me vakasucuma kina e dua na gone e duruqu, me dua kina na luvequ mai vua."

⁴Sa soli Bila vua, ka sa curumi koya sara o Jekope.

⁵Sa kunekune o Bila, ka vakasucuma vei Jekope e dua na tagane.

⁶Sa tukuna o Raijeli, "Sa vakatulewa vei au na Kalou; sa rogoca talega o koya na domoqu ka solia vei au e dua na gone." Sa vakayacani koya kina me o Tani.

⁷Sa kunekune tale na dauveiqaravi nei Raijeli, o Bila, sa vakasucuma vei Jekope nai karua ni luvena.

⁸Sa tukuna o Raijeli, "Au sa veiqati vakalevu kei na tuakaqu ia, au sa toso tikoga." Sa vakayacana na gone me o Navitalai.

⁹O Lia, ni sa sega tiko ni dua tale na luvena, sa tauri Siliva na nona dauveiqaravi ka solia vei Jekope me curumi koya.

¹⁰O Siliva sa vakasucuma vei Jekope e dua na tagane.

¹¹Sa tukuna o Lia, "Sa lako tiko mai na mataivalu." Sa vakayacana me o Kata.

¹²O Siliva sa vakasucuma nai karua ni luvei Jekope.

¹³Sa tukuna o Lia, "Au sa marau, ni ra na tukuna vei au na goneyalewa na dauveivakalouvinakataki." Sa vakayacani koya kina me o Aseri.

¹⁴O Rupeni sa lako yani ena gauna ni tatamusuki, ka sa kunea mai e so na wainimate ni moce, ka sa kauta sara mai vei tinana. Sa kerekere yani o Raijeli vei Lia ka vaka: "Au kerea e so na wai ni moce nei Rupeni."

¹⁵Sa sauma mai o Lia, "E se lailai vei iko o Jekope na watiqu? Oqo, o sa vinakata tale na wai ni moce nei luvequ talega?" Sa sauma yani o Raijeli, "Drau moce vata mada ena bogi oqo, mei sosomi ni wai ni moce oqori."

¹⁶Ni sa lesu mai o Jekope mai na veiwere ena yakavi, sa lako yani o Lisa ka tukuna vua, "Mo mai curu vei au, ni sa o saumi oti ena wai ni moce nei luvequ." E rau sa mai veimoceri ena bogi o ya.

¹⁷Na Kalou sa rogoci Lia, sa kunekune ka vakasucuma vei Jekope nai ka lima ni luvena tagane.

¹⁸Sa tukuna kina o Lia, "Na Kalou sa solia vei au na kequ i voli, ni'u sa solia na noqu dauveiqaravi vei watiqu." Sa vakayacani koya kina me o Isakari.

¹⁹Sa kunekune tale o Lia, ka sa vakasucuma nai ka ono ni luvena vei Jekope.

²⁰Sa tukuna o Lia, "Na Kalou sa vakatikora vei au na veika vivinaka, oqo sa na tikoga kina vata kei au o na watiqu, baleta ni'u sa vakasucuma vua e ono na luvena tagane." Sa vakayacani koya kina me o Sevuloni.

²¹Sa qai vakasucuma tale e dua na luvena yalewa, ka vakayacani koya me o Taina.

²²Na Kalou sa qai nanumi Raijeli, sa rogoci koya ka dolava na nona kato ni gone.

²³Sa kunekune ka vakasucuma e dua na tagane, ka tukuna, "Na Kalou sa kauta tani na noqu rogorogo ca."

²⁴Sa vakayacani koya me o Joseva ka tukuna kina, "O Jiova ena solia tale vei au e dua na luvequ tagane."

²⁵Ni sa vakasucumi Joseva oti o Raijeli, sa tukuna o Jekope vei Lepani, "Laivi au me'u lako, me'u lako ki na noqu tikina, ki na noqu vanua.

²⁶"Soli ira vei au na watiqu, kei ira na luvequ, o ira, au sa qaravi iko kina, ka laivi keimami me keimami lako, o sa kila talega na veiqaravi au sa cakava vei iko."

²⁷Sa tukuna vua o Lepani, "Mo tiko mada, kevaka au sa kune loloma e matamu, ni'u sa kila ka vulica ni o Jiova sa vakalouvinakataki au ena vukumu."

²⁸Sa qai tukuna tale yani, "Tukuna vei au na kemu i sau, au na solia vei iko."

²⁹Sa tukuna vua o Jekope, "O sa kila vinaka na noqu qaravi iko kei na qaravi ni nomu manumanu.

³⁰"Na veika e a tu vei iko e liu ni se bera na noqu lako mai, e lailai oqo sa levu sara; na Kalou sa vakalouvinakataki iko mai na gauna au a lako mai kina. Oqo au na vakania talega na noqu vale ena gauna cava?"

³¹Sa tukuna mai o Lepani, "Na cava me'u solia vei iko?" Sa sauma mai o Jekope, "Kua ni solia vei au e dua na ka, au na tiko tale me'u veiqaravi, kevaka o solia vei au na ka:

³²"Me'u lako mada yani ki na qele ni manumanu ena siga oqo, na manumanu kece sa tavutonotono me wasei mai na kena e dravu. Na sipi, na lami, na me, oqori me kequ i sau.

³³"Ena saumi vei au na noqu yalododonu na veisiga ni mataka, ni sa lako mai vei iko na kequ i sau. Na manumanu kece sa sega ni tavutonotono ena kedra maliwa na me, ka dravu vei ira na lami, era na kilai me sa ka butakoci, kevaka era sa kune vei au."

³⁴Sa tukuna o Lepani, "Io, oqori sa na vaka na nomu vosa!"

³⁵Ena siga o ya sa kauta tani na me tagane kece sa tavutonotono, kei na me yalewa kece sa tavutonotono, o ira kece sa via vulavula tiko, kei na ka dravu kece vei ira na lami, sa solia yani ki na ligadra na luvena.

³⁶Sa lako yani vakayawa mai vei Jekope. (me vaka na yawa, ni lakovi ena tolu na siga). O Jekope sa vakania tiko na vo ni manumanu i Lepani.

³⁷O Jekope ka taura tiko na taba ni kau drokadroka mai na amodi kei na Jesinati. Sa vocia na kulini kau me laurai mai na vulavula ni kau e loma.

³⁸Na kau kece sa voci veilutuki, sa cuva tiko mai na mata ni wai ena vanua era dau lako yani kina na manumanu me ra gunu. Me ra kunekune kina ni ra sa mai gunu.

³⁹Era sa kunekune ena mata ni kau sa voci tu. Na manumanu kece era sa vakasucuma mai na ka tavutonotono.

⁴⁰O Jekope sa wasei ira na lami, na manumanu kece me ra sa raica tikoga na kau sa voci tu, o ira talega na ka dravu ena qele ni manumanu nei Lepani. Era sa tiko tani ga na nona manumanu mai vei ira na manumanu nei Lepani.

⁴¹Sa yaco tiko ga na gauna, ni ra sa kunekune tiko mai na manumanu, o Jekope sa biuta tiko ga e matada na kau sa voci oti tu. Mera kunekune tiko ena nodra vakaraica tikoga na kau sa voci oti tu.

⁴²Na manumanu sa malumalumu sa biu tani “ na ka kaukauwa sa nei Jekope kei na ka malumalumu sa nei Lepani.

⁴³O Jekope sa tamata kaukauwa sara ka tamata yaco, sa levu na nona manumanu, sa levu na nona dauveiqaravi yalewa kei na tagane, sa levu sara na nona kameli kei na nona asa.