[18] Jope 23

¹Sa qai vosa o Jope, ka vaka:

²"Ena siga tale ga oqo na noqu kudru e sa gaga; Sa wadamele mai na ligaqu e na vuku ni noqu vutugu.

³Sobo! me'u kila mada ga na vanua me'u kunei Koya kina, Me'u bau torova sara na Nona i tikotiko!

⁴Au na vakatakila vua na ka e baleti au, Ka vakasinata na gusuqu ena noqu i vakamacala.

⁵Au na kila na vosa ena tukuna mai vei au, Ka yalomatuataka na ka ena tukuna vei au.

⁶Ena veivorati li kei au o Koya e na Nona kaukauwa levu? Sega! Ia ena nanumi au ga o Koya.

⁷Mai kea na yalododonu ena veilewai rawa kei Koya, Ia au na qai vakabulai me sega ni mudu mai vua na noqu Turaga-ni-lewa.

⁸"Raica, au sa lako i liu, ia sa sega kina o Koya, ki muri talega, ia au sa sega ni raici Koya kina;

⁹Ni sa cakacaka o Koya e na liga i mawi, au sa sega ni kunei Koya rawa; Ni sa vuki o Koya ki na liga i matau, au sa sega ni raici Koya rawa kina.

¹⁰Ia sa kila o Koya na sala au sa muria; Ni sa vakatovolei au oti o Koya, au na qai lako mai me vaka na koula.

¹¹Sa muria dina na Nona i lakolako na yavaqu; Au a tudei e na Nona sala, ka sega ni vuki tani.

¹²Au a sega ni biuta na vunau ni Tebenigusuna; Au a karona na vosa ni Gusuna me uasivi cake mai na qau kakana.

¹³"Ia o Koya sa dei tu ga, o cei ena veisautaki Koya rawa? Kei na ka sa vinakata na yalona, sa kitaka ga.

¹⁴Ni sa kitaka o Koya na ka sa lesia vei au, Ka sa vuqa na ka vakaoqo sa tiko Vua.

¹⁵O koya oqo au sa kidroa kina e matana; Ni'u sa vakananuma na ka oqo, au sa rerevaki Koya.

¹⁶Ni sa vakamalumalumutaka na yaloqu na Kalou, Ka sa vakarerei au o Koya sa Kaukauwa;

¹⁷Baleta ni'u a sega ni muduki tani mai na mata ni butobuto, Ka sa sega ni tabonaka o Koya na butobuto loaloa mai na mataqu.