[18] Jope 24

¹"Me vaka ni sega ni vuni na veigauna vei Koya sa Kaukauwa, Na cava era sega kina ni kunea na Nona siga o ira era kilai Koya?

²"Eso na tamata era tosoya nai yalayala ni vanua; Era kovea vakaukauwa na qele ni sipi, ka la'ki vakania;

³Era vakasava tani na nodra asa na luveniyal; Era taura na nona bulumakau na yada mei vakadinadina.

⁴Era biuti ira tani na dravudravua mai na sala; Era vakasaurarataki me ra vuni o ira na dravudravua kei vuravura.

⁵Raica, me vaka na asa kila mai na vanua dravuisiga, Era sa lako ki na nodra cakacaka; ka vakasaqara matua na kakana. Sa rawa mai lekutu na kedra kei na kedra talega na luvedra.

⁶Era dui tamusuka na kedra mai na i teitei. Ka ra vetia na nodra vaini nai valavala ca.

⁷Era davo luvawale ena bogi, ka sega ni vakaisulu, Ka sega ni vakaitutuvi ni sa batabata.

⁸Era sa suasua ena uca mai na veiulunivanua, Era sa mokota na vatu ni ra gadreva nai vakaruru.

⁹"Eso era kaliraka tani na luveniyali mai na mata-ni-sucu, Ka ra taura nai vakadinadina mai vei ira na dravudravua.

¹⁰Era vakavuna me ra lako luvawale na dravudravua; Ka kauta tani nai vau sila mai vei ira sa viakana.

¹¹Era caka waiwai e nodra loma ni bai, Ka butuqaqia na waini, ia era mate ga ena viagunu.

¹²Era vutugu na tamata mai loma ni koro, Ka sa qoqolou na yaloi koya sa mavoa; Ia e sega ga ni beitaki ira na Kalou ena nodra cala.

¹³"Era sa tu o ira era besetaka na rarama; Era sega ni kila na kena sala, Se muria tiko na kenai lakolako.

¹⁴Na daulaba sa duri cake kei na rarama; Sa vakamatea na dravudravua kei na luveniyali; Ia o koya sa vaka na daubutako ena bogi.

¹⁵Na matana na dauyalewa sa waraka na yakavi, E tukuna, 'Ena sega ni dua na tamata me kunei au'; Ka sa veisautaka nai rairai ni matana.

¹⁶Ena butobuto era curu butako ki na veivale Era a digitaka rawa ena siga me ra curuma; Era sega ni kila na rarama.

¹⁷Ni sa tautauvata vei ira na mataka kei na yaloyalo ni mate; Ke mani dua e kilai ira rawa, Era sa tiko ena kena rerevaki na yaloyalo ni mate.

¹⁸"E dodonu me ra totolo ena dela ni wai, E dodonu me vakarusai na nodra i votavota e vuravura, Me kakua ni dua e goleva na sala ki na nodra veiwere-ni-vaini.

¹⁹Me vaka e rau sa wai ni uca cevata na siga kei na katakata, Nai bulubulu sa tilomi ira vakakina nai valavala ca.

²⁰E dodonu me guilecavi koya na kete, Me na kani koya ena marau na baca; Me na kakua ni nanumi tale, Kei na caka ca me na raramusumusu me vaka na vunikau.

²¹Ni vakamavoataki o koya na yava e sega ni vakasucu gone, Ka sega talega ni caka vinaka vua na yada.

²²"Ia na Kalou sa yarataki ira tani na qaqa ena Nona kaukauwa; Sa tucake o koya, Ia e sega natamata me vakataudeitaka na bula.

²³E solia vei ira o Koya na vakacegu, ka ra vakararavi kina; Ia na Matana e yadrava tu na nodra sala.

²⁴Era vakalevulevui ena gauna lekaleka ga, Era sa qai yali, Era tabaki sobu; Era sa kau tani vakatikitiki me vakataki ira kecega na so; Era sa malai me vaka na vuni sila.

²⁵"Ia oqo kevaka e sega ni vakakina, o cei me vakadinadinataka ni'u tamata lasulasu, Ka vakatawayagataka na noqu vosa?"