[18] Jope 27

¹Ia e vakuria o Jope na nona vosa vakaibalebale, ka vaka:

²"Me vaka sa bula na Kalou, o Koya sa kauta laivi na lewa dodonu vei au, Kei Koya sa kaukauwa, o Koya sa vakararawataka na yaloqu,

³Me vaka na dede ni kena tiko e lomaqu na noqu i cegu, Kei nai cegu ni Kalou ena qara ni ucuqu,

⁴Ena sega ni vosataka na ka ca na tebenigusuqu, se cavuta na veivakaisini na yamequ.

⁵Me yawa sara vei au me'u tukuna ni dou dina; Me yacova ni'u mate au na sega ni biuta tani vei au na noqu yalododonu.

⁶Na noqu yalododonu au sa taura matua, ka'u na sega ni biuta; Ena sega ni beitaki au na yaloqu e na veisiga kece ni noqu bula.

⁷"Me na tautauvata na kequ meca kei na tamata ca, Kei koya talega e na vorati au me vakataki ira na sega dodonu.

⁸Ia na cava me nuitaka o koya na dauveivakaisini, Kevaka e sa rawata eso na ka, Kevaka sa kauta tani na nona bula na Kalou?

⁹Ena rogoca beka na Kalou na nona tagi Ni sa yacovi koya na ka rarawa?

¹⁰Ena vakamarautaki koya beka vakai koya vei Koya sa Kaukauwa? Ena dau masu beka vua na Kalou e na gauna kecega?

¹¹"Au na vakavulici kemudou ena vuku ni Liga ni Kalou; Na cava e tu vei Koya sa Kaukauwa au na sega ni vunia.

¹²E dina oi kemudou kecega dou sa raica oti; Na cava dou qai vakaitovotaki kemudou kina e na ka lialia?

¹³"Oqo na nonai votavota na tamata ca mai vua na Kalou, Kei na nodra i votavota na tamata i valavala kaukauwa, era rawata mai vei Koya sa Kaukauwa;

¹⁴Kevaka sa vakalevutaki nai wiliwili ni luvena, era na mate ena seleiwau; Era na sega talega ni mamau ena madrai o ira na nona kawa.

¹⁵O ira era vo tiko vua era na buluti ni ra sa mate, o ira talega na nodra yada era na sega ni tagi,

¹⁶Kevaka mada ga e binia vata na siliva me vaka na kuvu-ni-soso, Ka binia vata nai sulu me vaka na qele“

¹⁷Ena binia vata ga o koya, ia na yalododonu ga ena daramaka, Kei ira e sega na nodra cala era na wasea na siliva.

¹⁸E tara o koya na nona vale me vaka na nuve, Me vaka na vale ni yadra sa cakava nai vakatawa.

¹⁹Ena davo sobu na tamata vutuniyau, Ia ena sega ni vakaturi cake, Sa dolava o koya na matana, Ka sa yali o koya.

²⁰Na domobula sa lako siviti koya me vaka na waluvu; E dua na cava sa butakoci koya tani ena bogi.

²¹Sa kauti koya tani na cagi ni tokalau, ka sa yali o koya; Sa kuitaki koya tani mai nona yasana.

²²Ena biliraki koya ka sega ni lomana; Sa dro tani o koya ena domobula mai na ligana.

²³Era na vakasausautaki koya na tamata. Ka vakasiusiutaki koya tani mai na nona yasana.