[18] Jope 38

¹Sa qai vosa mai vei Jope o Jiova mai na covulaca, ka vaka:

²"O cei oqo sa vakabutobutotaka na lewa, E na vosa sa sega kina na kila ka?

³Mo vauca vakatagane na tolomu; Ni'u na vakatarogi iko, ia mo sauma mai vei Au.

⁴"O a tu mai vei ni'u a tauyavutaki vuravura? Mo tukuna mai, kevaka o sa kila.

⁵O cei e lewa na kenai vakarau, kevaka o sa kila? Se o cei sa dreta na dali ni kenai vakarau?

⁶Sa vakadeitaki e na cava na kena yavu? Se o cei e a tea na kena vatu i tutu,

⁷Ni ra sa sere vata na kalokalo volasiga, Ka ra kaila e na reki o ira kecega na luve ni Kalou?

⁸"Se o cei e a sogolatia na wasawasa e nai sogo, Ni sa loka, me vaka ni sa curu mai na kete;

⁹Ni'u a cakava na o me kenai sulu, Kei na butobuto loaloa me kenai vau;

¹⁰Ni'u a vakarauta na kenai yalayala, ka cakava na kenai vakadei kei na kenai sogo;

¹¹Ka tukuna, 'Mo yaco mai kike, kakua ni sivia, Ia me yala ga eke na nomu ua me kakua ni sivia!'

¹²"O vakarota beka na mataka e nai tekivu ni nomu siga, Ka vakatakila ki na mataka na vanua me kida kina,

¹³Me na taura nai yalayala kei vuravura, Me ra kuretaki tani kina o ira nai valavala ca?

¹⁴Sa rairai oqori me vaka na tete ki na ka sa tabaki kina; Sa kune votu me vaka nai sulu.

¹⁵Sa bureitaki vei ira nai valavala ca na kedra rarama, Ia ena ramusu na liga sa viavialevu.

¹⁶"O sa curuma beka nai vurevure ni waitui? Se o sa lako voli e na dreke ni wasawasa?

¹⁷Se sa dola oti vei iko na katuba kei mate? Se o sa kunea na kenai sogo ni yaloyalo ni mate?

¹⁸Se o kila beka na kena raraba ni vuravura? Tukuna mai kevaka o sa kila na kecega oqo.

¹⁹"E vei na gaunisala sa tiko kina na rarama? Ia na butobuto E vei na kena vanua,

²⁰Mo kauta kina ki na kenai yalayala, Mo kila talega kina na sala ki na kena vale?

²¹O sa kila beka ni o a qai sucu? Se ni sa vuqa nai wiliwili ni nomu siga?

²²"O sa curuma beka na lololo ni uca-vulavula? Se o sa raica na lololo ni uca-cevata,

²³Au sa maroroya ki na gauna ni rarawa, Ki na siga ni tuvai valu kei nai valu?

²⁴Na sala cava sa wase kina na rarama, Sa veibiuyaki kina na cagi mai na tokalau kei vuravura?

²⁵"O cei e wasea na sala ni wai me tau mai kina ni sa vuabale, Se na sala me sei kina na kurukuru;

²⁶Me tau kina na uca ki na vanua sa sega kina na tamata; Kei na lekutu, sa sega kina na tamata;

²⁷Ka me vakamamautaka na vanua sa lala ka sega ni teivaki; Me vakatubura talega na mata ni co malumalumu me rovu mai?

²⁸Sa vakatamani beka na uca? Se o cei beka e vakatubura na mata ni tegu?

²⁹Na kete i cei e lako maikina na waicevata? Na tegu cevata talega ni lomalagi, o cei e vakasucuma?

³⁰Sa tabogo na wai me vaka e na vatu, Ka sa cevata na dela ni wai titobu.

³¹O na vauca vata rawa na veikalokalo o Peliatisi, Sa sereka nai vau kei Oraioni?

³²"O na kauti Masaroci beka mai e na kena gauna? Se tuberi Akituro yani kei ira na luvena?

³³O kila beka nai valavala ni kena lewai na lomalagi? O sa vakayacora rawa, mai na kena lewa ki vuravura?

³⁴"O sa tabalaka rawa beka na domomu ki na o, Me tauci iko na wai levu?

³⁵O na vakatala rawa beka na livaliva, me lako yani, Me mai tukuna vei iko, 'Oi keitou ga oqo!'?

³⁶O cei e vakacuruma na vuku ki na lomada? Se o cei e vakayalomatuataka na tamata?

³⁷O cei sa wilika rawa na o kei lomalagi e na nona vuku? Se o cei e livia rawa na wai mai na tavaya kei lomalagi,

³⁸Ni sa kaukauwa mai na kuvu-ni-soso, ka veikabiti sara na qele qa?

³⁹"O na vakasasa beka me kena kakana na laione? Se vakamamautakai ira na luve ni laioni ni ra sa viakana,

⁴⁰Ni ra sa davo sobu e na nodra i davodavo, Ka tiko ga e na tikina vuni ni ra lawa koto?

⁴¹O cei e solia na kena na reveni, Ni sa tagi na luvena vua na Kalou, Era sa lako sese voli ni sa sega na kedra?