[18] Jope 39

¹"O sa kila beka na gauna sa vakasucu kina na me kila ni veiulunivanua? Se o sa kila rawa na gauna sa vakasucu kina na teira?

²Se o sa wilika rawa na vula era sa yacova? Se o kila na gauna era vakasucu kina?

³Era davo no e ra, era kauta mai na nodra lalai, Era vakasucuma na luvedra.

⁴Sa yagovinaka na luvedra, era tubu kaukauwa ni levu na sila; Era lako tani ka sega ni lesu tale vei ira.

⁵"O cei sa sereka na asa kila me veitalia voli, Se o cei sa sereka nai vesu ni asa kila?

⁶Au sa cakava na lekutu me nona vale, Kei na vanua dravuisiga me nonai tikotiko?

⁷Sa beci ira na lewe vuqa e na koro, Ka sa sega ni vakarorogo ki na nona kaila na draiva.

⁸Na nonai kanakana na veiulunivanua, ka sa qara na co drokadroka kecega.

⁹"Ena via qaravi iko beka na iunikoni? Se na via tiko beka e na nomu lomanibai?

¹⁰O na vauca rawa beka na iunikoni e na kena dali ki nai siviyara? Se na yara beka nai siviyara o koya ka muri iko?

¹¹O na vakararavi beka vua ni sa levu na nona kaukauwa? Se o na vakatautaka beka vua na nomu cakacaka kecega?

¹²O na nuitaki koya beka me kauta mai ki vale na nomu sila, Ka yauta mai ki na nomu vatu ni i qaqi?

¹³"Sa vakadokadokai koya na ositeriji ni sa yalovaka na tabana, Ia e rau sa yaga li na tabana kei na ligana vua na luvena?

¹⁴Sa vakalutuma na kena yaloka ki na qele, Ka vakatakatataka e na kuvu ni soso;

¹⁵Ka sa sega ni nanuma de na butuka na tamata, Se na vorolaka na manumanu kila.

¹⁶Sa loma kaukauwa vei ira na luvena, me vaka era sega ni nona; Na nona cakacaka sa ka wale, ka sa sega e kauwai kina,

¹⁷Baleta na Kalou e bureitaka vua na vuku, Ka sega talega ni ukutaki koya ena yalomatua.

¹⁸Ni sa wavu tu vakadodonu o koya, Ena beca na ose kei koya sa vodoka.

¹⁹"O sa solia beka vua na ose na kaukauwa? O sa vakasuluma beka na domona ena kurukuru?

²⁰E rawa beka ni o vakarerei koya me vaka na vodre? Na suru ni ucuna sa ka rerevaki.

²¹Sa qeva na buca e na yavana, ka reki e na nona kaukauwa; Sa ciciva yani na vanua ni veiraravui.

²²Sa dredrevaka na rere, ka sa sega ni taqaya; Sa sega talega ni dro tani mai nai seleiwau.

²³Sa tataqiriqiri ka yavavala na ka kecega, Na moto makamakalivata kei nai sua ni tavuto.

²⁴Sa ciciva na vanua vakayawa e na nona lomakatakata kei na cudru; Ka sa sega ni tu vakadua ni sa qai uvu na davui.

²⁵Ena rorogo ni domo ni davui sa tukuna kina o koya, 'Ae'! Sa boica nai valu ni sa yawa tu, Kei na nodra kurukuru na kavetani kei na kaikaila.

²⁶"Sa vuka cake beka na Ikeli e na nomu vuku, Ka vakatetaba me vuka ki na mata ni ceva?

²⁷Sa vuka beka na ikeli ni o sa vakaroti koya, Ka tara na nona sova e na vanua cecere?

²⁸Sa tiko mai na uluvatu ka sa tudei kina, E na bati ni uluvatu, kei na tikina dredre.

²⁹Mai na yasana o ya sa qara na kena; Sa irova vakayawa na matana.

³⁰Na luvena talega sa daugunu dra; Ia e na vanua sa no kina na mate, sa tiko kina o koya."