[18] Jope 41

¹"O sa yavia rawa beka mai na livaiacani ena siwa? Se vauca na yamena ena dali o sa vakatukuca sobu?

²O na daramaka beka e dua na dali ki na ucuna? Se cula basika na galegalena ena i qila?

³Ena masuti iko vakalevu beka? Ena vosa beka vakamalua vei iko?

⁴Ena ia beka na veiyalayalati kei iko? O na kauti koya li me nomu tamata dauveiqaravi ka sega ni mudu?

⁵O na vaqitori koya beka me vaka vua na manumanu vuka? Se o na vauca beka me nodra na nomu vada?

⁶Era na cakava beka na nomui tokani me magiti ni solevu? Era na vota beka vei ira na dauveivoli?

⁷O na vakasinaita rawa beka ena kulina moto leleka? Se na uluna ena moto ni ika?

⁸Ni o tarai koya ena ligamu; Nanuma nai valu ”Kakua ni cakava tale!

⁹E dina, na vakanuinui kece ni rawa ni vesu o koya e lasu kecega; Ena sega beka ni domobula e dua ni sa raica walega?

¹⁰Sa sega e dua sa doudou me via vakacudruya. Ia o cei ena yatedei me tu rawa e Mataqu?

¹¹O cei mada sa liu mai vei Au, e dodonu Me'u saumi koya? Na ka kecega sa tu e ruku ni lomalagi sa Noqu.

¹²"Au na sega ni vunia na veitiki ni yagona, Na nona kaukauwa, se nona vatukai vinaka.

¹³O cei sa luvata rawa na nonai sulu esau? Se o cei me na rawa ni vesuki koya e nai tarovi sa taqarua?

¹⁴O cei e rawa ni basuka nai sogo ni matana? Ni sa volita tu na batina vakarerevaki?

¹⁵Sa vu ni nona dokadoka na varina, Sa sogodregati matua vata sara;

¹⁶Era sa rui veikabiti voleka me dredre kina ni curu ena kedra maliwa na cagi;

¹⁷Era sa dui sema vata e dua ki na kenai sa, Sa veikabiti ga me dredre kina ni tawase.

¹⁸Ni sa suru o koya, sa cila mai vua na rarama, Ia na matana sa vaka ni sa kida na mataka.

¹⁹Sa lako mai na gusuna na cina caucaudre, Sa lidi maikina na mata ni buka waqa.

²⁰Sa kuvu mai na ucuna na kubou, Me vaka mai na kuro sa kere, se na co malai sa kama.

²¹Na nonai cegu sa vakawaqaca na qilaiso, Ka sa lako mai na gusuna na yameyame-ni-buka.

²²Na kaukauwa sa tiko e domona, Ka sa meke e matana na rarawa.

²³Nai sema ni lewena sa veikabiti vata; Sa kabiti koya vakaukauwa ka sega ni yavalati rawa.

²⁴Sa kaukauwa na yalona me vaka na vatu, Io, sa kaukauwa me vaka na vatu ni qaqi sila.

²⁵Ni sa tucake o koya, era sa rere na qaqa; Ni sa yavavala, sa yali na yalodra.

²⁶E dina ga ni yacovi koya nai seleiwau, ia e sega ni yaga; Sa vakakina na moto, na saisai, se nai sua ni tavuto.

²⁷Sa nanuma o koya me co malai na kaukamea, Kei na varasa me kau vuca.

²⁸Ena sega ni vakasavi koya rawa na gasau; Na vatu sa rabotaki sa vaka na vuni sila ki vua.

²⁹Na moto leka sa nanuma o koya me kau-nisila madu; Sa dredrevaka na rorogo ni isua ni tavuto.

³⁰Na ketena sa vaka nai caca ni kuro gagata; Sa teteva yani na lolobo na kena gagata.

³¹Sa cakava o koya na wai titobu me kere vaka na kuro; Sa cakava o koya na waitui me vaka na kuro i lumu.

³²Na we ni nonai lakolako sa caucaudre; E rawa ni nanumi me sa ulu vula na wai titobu.

³³Sa sega na ka e vuravura me rau tautauvata, o koya sa buli me sega ni rere rawa.

³⁴Sa raica mada o koya na ka cecere kecega; Sa tui o koya vei ira kecega na luve ni viavialevu."