[18] Jope 42

¹Sa qai vosa vei Jiova o Jope, ka vaka:

²"Au sa kila ni Kemuni sa rawata na ka kecega, ka sa sega ni tarovi rawa e dua na ka o ni sa nakita.

³O ni sa taroga, 'O cei oqo sa vunitaka na lewa e sega kina na vuku?' O koya au a cavuta kina na ka au a lecava, Na ka e veivakurabuitaki vei au, ka'u a sega ni kila.

⁴Mo ni rogoci au, yalovinaka, me'u vosa mada; o ni a tukuna, 'Au na tarogi iko, ia mo na sauma mai vei au.'

⁵"Au a rogoci Kemuni ena daligaqu walega, Ia oqo na mataqu sa qai raici Kemuni.

⁶O koya oqo au sa beci au sara kina, ka veivutuni ena kuvu-ni-soso kei na dravusa."

⁷Ia ni sa vosataka oti o Jiova na vosa oqo vei Jope, sa qai tukuna vei Ilivasi na Temanaiti o Jiova, "Sa waqa na noqu cudru vei iko kei rau talega na nomui tokani ruarua, ni dou sa sega ni tukuni Au vakadodonu, me vakataki Jope na noqu tamata.

⁸"Ia oqo, mo dou kauta mada e vitu na bulumakau kei na vitu na sipi tagane, ka lako vua na Noqu tamata o Jope, ka vakacabora na i soro kama ena vukumudou; ena qai masulaki kemudou o Jope na Noqu tamata. Au na ciqomi koya ga, de'u na sauma vei kemudou me vaka na nomudou lialia, ni dou a sega ni tukuni Au vakadodonu me vakataki Jope na Noqu tamata."

⁹E ratou sa qai lako o Ilivasi na Temanaiti, kei Vilitati na Suaiti, kei Sofa na Neamataiti, ka cakava me vaka sa vakarota vei iratou o Jiova; ni sa vakadonui Jope o Jiova.

¹⁰Ia na Kalou sa vakasuka tale vei Jope na veika sa vakayalia ni sa masulaki iratou na wekana. E dina sa vakaruataka o Jiova vei Jope nai votavota ni ka ka tu vua e liu.

¹¹Ia o iratou na tacina kecega, kei iratou na ganena kecega, kei ira kece sa nona i tokani e liu, era sa qai lako mai vua ka mai kana vata ena nona vale; a ra sa vakamarautaki koya, ka vakacegui koya ena vuku ni ka rarawa kecega sa vakayacora vua o Jiova. Era sa dui solia yadua vua e dua na tiki ni siliva ka yadua na mama koula.

¹²Ia o Jiova sa vakalouvinakataka vakalevu cake na veisiga i Jope sa muri mai na nona veisiga e liu; ni sa tinikava na udolu na nona sipi, ka ono na udolu na kameli, dua na udolu na bulumakau tagane kei na dua na udolu na asa tagane.

¹³Ka sa le vitu talega na luvena tagane kei na lewe tolu na luvena yalewa.

¹⁴Sa vakayacana na kenai matai o Jimaima, kei na yacana nai karua o Kesaia, kei na yacana nai katolu o Kereni-apuka.

¹⁵Ka sa sega ni kune ena vanua taucoko o ya na yalewa sa matavinaka me vaka na luve i Jope; a sa vota vei iratou o tamadratou nai votavota ena kedra maliwa na ganedratou.

¹⁶Sa oti oqo sa bula tiko o Jope ka dua na drau ka vasagavulu na yabaki, ka raici iratou na luvena kei ira na makubuna me va nai tabatamata.

¹⁷Sa qai mate o Jope, ni sa qase mai ka vuqa na nona yabaki.