[20] Vakaibalebale 10

¹Na gone yalomatua sa vakamarautaka na tamana, ia, na gone lialia sa ka ni rarawa vei tinana.

²Na nodra i yau na tamata ca, sa sega ni yaga ena dua na ka, Ia, na yalododonu sa veisereki mai na mate.

³O Jiova sa sega ni vakatara me ra via kana na yalododonu, ia, sa kauta tani na nodra gagadre na tamata ca.

⁴O koya sa cakacaka vata na tamata vucesa ena dravudravua mai, ia na ligana na gugumatua ena vutuniyau kina.

⁵O koya sa kumukumuni ena vula i katakata sa tamata yalomatua, o koya sa moce ena gauna ni tatamusuki sa tamata dauveivakamaduataki.

⁶Na veivakalouvinakataki sa tiko e uludra na yalododonu, ia, na veivakasaurarataki sa sogota na gusudra na tamata ca.

⁷Na nodra vakananumi na yalododonu sa veivakavinakataki, ia, na yacadra na tamata ca ena yali yani.

⁸Na yalomatua ena ciqoma nai vakaro, na tamata vakagonegonea ena bale.

⁹O koya sa lako vakadodonu tiko sa doudou, o koya sa lako vakaveve ena kilai.

¹⁰O koya sa daubobo mataidua, sa dau vakavuvala, o koya sa vakagonegonea ena bale.

¹¹Na gusudra na yalododonu sai vurevure ni bula, Na ca kecega sa sinal ena gusudra na tamata ca.

¹²Na yalo ca sa vakavuna na veileti, Na loloma sa ubia nai valavala ca kecega.

¹³Na yalomatua sa kune ena tebe ni gunusa na vuku, Na kuita sa tau ki dakuna na yalowai.

¹⁴Na yalomatua sa binia cake na vuku, Na gusuna na lialia sa voleka kina veivakarusai.

¹⁵Na nona i yau na vutuniyau, sa nona koro kaukauwa; Na dravudravua sa vakarusai ena nona dravudravua.

¹⁶Na nona oca na yalododonu sa kauti koya ki na bula, Nai sau ni tamata ca nai valavala ca

¹⁷O koya sa maroroya nai vakavuvuli, sa tiko ena sala ni bula, o koya sa bese ni vakavulici, sa lako sese tikoga.

¹⁸O koya sa vunia tiko na ca, sa tamata lasulasu, o koya sa vakaucaca tiko, sa tamata lialia.

¹⁹Ni sa levu na vosa, sa sega ni yali na i valavala ca, o koya sa qarauna na gusuna, sa yalomatua.

²⁰Na yamena na yalododonu, sai yau talei, Na yalona na tamata ca, sa sega ni yaga.

²¹Na tebe ni gusuna na yalododonu sa vakania na lewe vuqa, Era sa mate ga na lialia ni sa sega na yalomatua.

²²Na veivakalouvinakataki i Jiova sa veivakavutuniyautaki, sa sega ni vakuria na rarawa.

²³Na caka ca sa vaka na qito vua na lialia, Ia, na tamata sa kila na ka sa yalomatua.

²⁴Na nona rere na tamata ca ena lakovi koya mai, Na nona gagadre na yalododonu, e na vakadonui.

²⁵Ni sa lako mai na covulaca, ena yali na tamata ca, Na yalododonu sa dua na nona yavu sa sega ni mudu.

²⁶Me vaka na wai wiwi ki na bati kei na kubou ki na mata, Sa vaka kina na vucesa vei ira sa veitalai.

²⁷Na rerevaki Jiova,, sa vakabalavutaka na veisiga ni bula. Na nodra yabaki na tamata ca e na vakalekalekataki.

²⁸Na vakanuinui ni yalododonu sai koya na nona marau, Na nodra nanamaki na tamata ca sa rusa laivi.

²⁹Na sala nei Jiova sa kaukauwa vei ira na dodonu sara, Na veivakarusai vei ira sa dau cakava na ka ca.

³⁰E na sega ni yavalati na yalododonu, o ira na tamata ca era na sega ni taukena na vanua.

³¹Na gusuna na yalododonu sa kauta mai na yalomatua, ia na gusu daveivakaisini ena musuki tani.

³²Na tebenigusuna na yalododonu e na kila na ka sa ciqomi, Ia, na gusuna na tamata ca sa tukuna ga na ka ca.