[20] Vakaibalebale 9

¹Na yalomatua sa tara cake na nona vale, sa taya oti na kena duru e vitu;

²Sa vakamatea na kena manumanu, sa ulia oti na kena waini, sa vakarautaka oti talega na kena teveli.

³Sa talai ira yani na dauveiqaravi, Sa daukaci ena vanua cecere ni veikoro,

⁴"O koya sa yalowai, gole mai ki ke!" vei koya sa sega vua na kila ka, tukuna vua,

⁵"Lako mai, mai kana madrai mai gunuva na waini au sa vakarautaka.

⁶Biuta na lialia mo bula, lakova na sala ni vuku.

⁷"O koya sa vakadodonutaka na lialia, ena vakamaduataki: kei koya sa vunauca na tamata ca sa vakacacani koya ga.

⁸Kua ni vunauca na dauveivakalialiai, de qai cati iko; vakadodonutaka na tamata yalomatua, ena lomani iko.

⁹Solia nai vakasala vua na tamata yalomatua, ena yalomatua sara.Vakavulica na tamata dina, ena tubu cake na nona kila ka.

¹⁰"Na rerevaka na Kalou, sai vakatekivu ni yalomatua, na kila na ka Tabu sai koya na vuku.

¹¹E na vukuqu, ena levu kina na nomu veisiga kei na yabaki ni nomu bula ena vuqa mai.

¹²Kevaka o sa yalomatua, sa nomu ga, kevaka o sa lialia, o na tauca ga o iko." Na Nona Sala Na Yalowai

¹³Na yalewa lialia sa domolevu; sa yalowai ka sega na ka e kila.

¹⁴Sa dabe tiko ena katuba ni nona vale, ena i dabedabe e cere i cake ena veiyasa ni koro,

¹⁵Me dau kacivi ira sa lako tu, sa lako tu vakadodonu ena nodra i lakolako";

¹⁶"O koya sa yalowai me lako mai ki ke," vei koya sa sega na ka e kila, sa tukuna vua,

¹⁷"Sa kamikamica na wai butakoci, na kana vuni sa rui vinaka."

¹⁸Sa sega ni kila o koya na yalowai, ni ra sa tu mai kea na tamata sa mate oti, kei ira kecega sa lako tiko yani kina, era sa tiko ena titobu kei Eli.