[20] Vakaibalebale 8

¹Sa sega beka ni kaci tiko o yalomatua se kaila tiko o vuku?

²Sa tucake tu ena nona i tutu, ena vanua cecere, ena vanua sa sota kina na vei salatu.

³Sa kacikaci mai matamata, ena i curucuru ni koro; ena i curucuru ni katuba:

⁴"O iko, na tagane, au sa kaci, na kaci oqo ki vei ira na luvemuni.

⁵O iko na yalowai, mo yalomatua mai, O iko na lialia, mo vuku ka kila ka mai.

⁶Vakarorogo, au na cavuta na ka dina, Ni'u sa dolava na gusuqu, ena lako mai kina na ka dina;

⁷Na gusuqu ena tukuna na dina; na ca kecega, me yali sara mai gusuqu.

⁸Na vosa kecega ni gusuqu sa dodonu sara, sa sega kina na ca kei na veivakasesei.

⁹Sa vinaka kecega vei ira sa vuku ka dodonu kecega vei ira na dau kila sara na ka.

¹⁰E vinaka cake nai vakavuvuli mai na siliva, E vinaka cake na vuku mai na koula;

¹¹Na yalomatua e vinaka cake mai na rupi, kei na ka kecega e vinakati, e sega ni vakatauvatani rawa kei koya.

¹²"Oi au na yalomatua kei rau sa tiko vata na yaloqaseqase, Au sa kila na ka e dau vakananumi.

¹³Na rerevaki Jiova sai koya na cata na ca, na dokadoka, na viavialevu kei na sala ca kei na gusu ca, au sa cata.

¹⁴Sa noqu nai vakasala, kei na yalomatua e taucoko; Oi au na vuku, sa tu vei au na kaukauwa levu.

¹⁵Ena vukuqu, era veiliutaki kina na tui ka ra lewa kina na dau ni lewa.

¹⁶Ena vukuqu, era veiliutaki kina na veiliutaki ka era lewa e vuravura.

¹⁷Au sa lomani ira era sa lomani au, ka kunei, mai vei ira sa vakasaqarai au.

¹⁸Na sautu kei na dokai sa tiko vata kei au, nai yau e levu sara kei na yalododonu.

¹⁹Na vuaqu e vinaka cake mai na koula, Na noqu i yau e vinaka sara, mai na siliva.

²⁰Au sa liu tiko mai na sala ni yalododonu, Au tu talega ena sala ni lewa dodonu,

²¹Me'u vakavuna kina na nodra vutuniyau o ira sa lomani au, me'u vakatawana tikoga kina na nodra i lololo.

²²"Au sa nei Jiova ni se qai tekivu na nona i lakolako. Ni se bera mada ga ni tekivu na nona cakacaka.

²³Au sa vakadeitaki mai na sega ni mudu, mai na i vakatekivu, ni se bera ni dua na vuravura.

²⁴Ni se bera na titobu, au sa kau cake mai, ni se bera talega nai vurevure sa sinai ena wai, au sa tiko oti.

²⁵Ni se bera na veiulunivanua, na veidelana au sa tiko oti;

²⁶Ni se bera na vanua kei na kena buca, na curu ni soso,

²⁷Ni sa vakarautaka na lomalagi, au sa tiko mai kina,

²⁸Ni sa vakatikora na vei o ni lomalagi, au sa tiko mai kina, sa vakaukauwataka talega nai vurevure ni titobu,

²⁹Sa biuta nai yalayala ni wai, sa sega ni sivia nai yalayala na wai ena vuku ni nona lewa, sa makataka talega na yavu kei vuravura,

³⁰Au sa tiko e yasana me vaka na dau tulituli vinaka, au sa nona ka rekitaki ena veisiga, ka mamarau tiko e matana,

³¹Reki tikoga ena nona vuravura sa lala tu, na noqu marau sa tikoga vei ira na luve ni tamata.

³²"O koya oqo, dou vakarorogo kina vei au na luvequ, sa kalouvinaka o koya sa maroroya na noqu sala.

³³Rogoca nai vakavuvuli mo yalomatua, kua ni besetaka.

³⁴Sa kalouvinaka o koya sa vakarorogo vei au, sa vakararai tiko ena noqu matamata ena veisiga, sa wawa tiko ena mata ni noqu katuba.

³⁵O koya sa kunei au, sa kunea na bula, ka sa taleitaki koya o Jiova;

³⁶O koya sa cala vei au, sa vakacacana na yalona, O ira sa cati au, era sa lomana na mate."