[20] Vakaibalebale 7

¹Na luvequ, maroroya na noqu vosa, mei yau talei vei iko na noqu i vakaro.

²Maroroya nai vakaro mo bula, kei na noqu i vunau me vaka na loa ni mata.

³Vesuka e na nomu i qaqalo, vola sara e lomamu.

⁴Tukuna vua na yalomatua, "O iko na ganequ," tukuna vua na vuku, o iko na wekaqu voleka,

⁵Me rawa ni rau maroroi iko mai vua na yalewa ca, mai vua talega na yalewa sa veidreti vakalevu na yamena.

⁶Mai na katuba leka ni noqu vale, ni'u sa vakararai yani,

⁷Ni'u sa rai yani mai na katuba cicila, Au sa raica e dua na cauravou, sa yalowai, Sa sega talega ni vakayalo.

⁸Sa lako voleka ki nona tikina na dautagane oqo, sa muria sara na sala ki na nona vale

⁹Ni sa yakavi mai, sa bogi, sa loaloa, ka sa butobuto.

¹⁰E rau sa sota kei na yalewa oqo, sa vakaisulu ena kena i sulu, ka sa qaseqase sara na yalona.

¹¹Sa domolevu ka murimuri lomana, sa sega ni tiko dei na yavana e vale.

¹²Sa dau tu vakalevu e tuba, ena saqata talega ni koro, sa wawa tu e na veitutu ni sala kecega.

¹³Sa toboki koya, ka kisivi koya, na matana sa veivakaisini tiko, sa tukuna mai:

¹⁴"Sa tu oqo vei au na veivinakati, ena siga oqo, au sa vakaio oti ki na ka kecega.

¹⁵Au sa lako mai oqo, me daru mai sota, Au sa vakasaqarai iko tiko mai, oqo, daru sa sota sara.

¹⁶Au sa samaka oti tu na noqu i davodavo, Sa vakaisulutaki oti ena lineni mai Ijipita.

¹⁷Sa tu kina na ka boi vinaka, na mura, na aloi, na sinamoni.

¹⁸Mai, daru mai lako ka veivakamarautaki, me yacova na mataka, me daru ia mada na veidomoni.

¹⁹E yali mai vale o watiqu; e lako sara tu vakayawa;

²⁰E kauta tu vakalevu nai lavo, ena qai lesu mai ena gauna sa lokuci oti."

²¹E na vosa kamikamica koya, sa vaka io kina o koya, ena vosa veicavilaki sa rawati koya kina.

²²Vakatotolo, sa muri koya sara, me vaka na bulumakau sa kau me laki vakamatei, se, me vaka na lialia ki na kena vale,

²³Me yacova ni sa coba vua na gasau ni dakai, me vaka ga na nona marautaka na curuma na dai na manumanu vuka, sa sega ni kila, ni na kau tani kina na nona bula.

²⁴O koya oqo mo ni vakarorogo kina vei au na luvequ, vakanamata ki na vosa ni gusuqu:

²⁵Na yalomu me kua ni gole ki na nona sala mo kua ni sese kina ena nonai lakolako;

²⁶Sa vakamavoataki ira e levu na tagane o koya, o ira kecega sa vakamavoataki mai vei koya, era sa tagane kaukauwa ka rogo.

²⁷Na nona vale sa gaunisala ki Eli, sa lutu sobu tiko ga ki nai wasewase ni mate.