[20] Vakaibalebale 11

¹Nai vakarau e lasulasu, sa ka vakasisila vei Jiova: Nai vakarau e donu, sa ka e taleitaka vakalevu o Koya.

²Na viavialevu kei na madua, e rau sala vata, ia, na yalomatua sa nodra na yalomalumalumu.

³Na nodra dina na yalododonu, ena tuberi ira, Na nodra sega ni dina na talaidredre ena vakarusai ira.

⁴Sa sega ni yaga nai yau, ena siga ni cudru, Ia na yalododonu sa veivakabulai mai na mate.

⁵Na nodra dodonu na sega/cala ena tuberi ira ena sala, ia na tamata ca ena bale ga, ena vuku ni nona malumalumu.

⁶Na nodra yalododonu na dodonu ena vakabulai ira, o ira na tamata sega ni dina ena tauri ira ga na nodra gagadre ca.

⁷Ni sa mate na tamata ca, na nona nanamaki kece ena vakarusai, kei na ka e nuitaka, ena yali yani.

⁸Sa vakabulai mai na nona leqa na yalododonu, na leqa o ya, sa lako vua na tamata ca.

⁹Na gusu dau veivakaisini sa vakacacana na wekana, Ia na vuku ga, sa vakabulai koya na yalododonu.

¹⁰Ni sa lako vakavinaka tiko vei ira na yalododonu, sa marau na koro taucoko; ni ra sa bale na tamata ca, sa levu na kaikaila.

¹¹Na nodra veivakalouvinakataki na yalododonu sa laveti kina na koro, ia, sa vuaviritaki tale na koro ena gusudra na tamata ca.

¹²O koya sa sega vua na yalomatua, sa vakacacana na wekana, ia, na tamata vuku ena qarauni koya.

¹³Na tamata dautalanoa, ena tukuna na ka kecega e vunitaki, o ira na tamata yalodina era na vunia na ka.

¹⁴Era na bale na tamata kevaka era sa sega ni vakasalataki; ia, ni sa levu na daunivakasala, era na vinaka na tamata.

¹⁵O koya sa yalataki koya vua na kai tani, ena vakacacani koya vakai koya, Sa maroroi koya, o koya sa bese na veiyalayalati.

¹⁶Na marama yalovinaka sa maroroya na nona dokai, Na turaga kaukauwa sa tu vua nai yau.

¹⁷Na tamata yalovinaka, sa caka vinaka ki na yalona, Na tamata cudrucudru, sa vakacacana na yagona.

¹⁸Na tamata ca sa cakava na cakacaka ni veivakaisini, Na tamata sa kaburaka na yalododonu, sa na dua dina na kenai sau vinaka.

¹⁹Na yalododonu sa veiliutaki ki na bula, o koya sa ciciva na ca, sa ciciva tiko na mate.

²⁰Na yalovakatani, sa cata na Kalou, Na sega ni cala, sa ka e taleitaka na Kalou.

²¹E dina ni ra sa to vata na tamata ca, era na totogitaki vakaidina ga, na nodra kawa ni mataka na yalododonu ena vakabulai.

²²Me vaka na mama koula ena ucu ni vuaka, sa vakakina na yalewa vinaka sa sega vua na yalomatua.

²³Na gagadre ni yalododonu sa vinaka ga, ia, na nanamaki ni tamata ca sa ca ga.

²⁴Sa dua na tamata sa veisoliyaka na ka, io, sa levu cake ga na ka e tu vua. Sa dua tale na tamata sa maninitaka na ka, io, sa levu cake ga na nona dravudravua.

²⁵Na yalo sa dausolisoli, sa na vakavutuniyautaki, o koya sa vakabulabulataka, ena vakabulabulataki talega.

²⁶Na tamata, era na rukaki koya sa yalocataka me solia nai tei, na kalouvinaka sa lako kina ului koya sa volitaka.

²⁷O koya sa vakasaqara matua na ka vinaka, ena kunea na veitokoni, na leqa ga ena lakovi koya sa goleva na ca.

²⁸O koya sa vakararavi ki na nona i yau, ena bale, o ira na yalododonu era na seraka ka vuavuai me vaka na kau bulabula.

²⁹O koya sa dau vakatubu leqa ena loma ni nona vale ena tamusuka na cagi, O ira na lialia, era na bobula nei koya sa yalomatua ena yalodra.

³⁰Na vua ni yalododonu sa vunikau ni bula, kei koya sa siwata rawa na yalo sa tamata yalomatua.

³¹Kevaka era sa saumi vakadodonu na yalododonu e vuravura oqo, qai vakacava li, o ira na tamata ca kei ira na tamata i valavala ca.