[19] Same 115

¹Me kua vei keimami, Jiova, me kua vei keimami, Ki na Yacamuni ga, me soli kina na lagilagi, Me baleta na Nomuni yalololoma, kei na Nomuni dina.

²E na cava me ra taroga kina na kai tani, "E vei na nodra Kalou?"

³Na neimami Kalou sa tiko mai lomalagi; Sa cakava ga na ka sa vinakata.

⁴Ia, na nodra matakau e siliva ka koula, e ka ga sa bulia na tamata.

⁵Era vakagusuna, ia era sega ni vosa rawa; Era vakamatana, ia era sega ni rai rawa;

⁶Era vakadaligana, ia era sega ni rogo rawa; Era vakaucuna, ia era sa sega ni boi rawa;

⁷Era sa vakaligadra, ia era sa sega ni taura rawa; Era vakayavadra, ia era sa sega ni lako rawa; Se me rorogo na vosa mai na nodra i tagitagi.

⁸O ira sa buli ira, sa vakataki ira ga; Sa vaka kina o ira sa vakabauti ira.

⁹Isireli, mo ni vakararavi vei Jiova, sa nodra i vukevuke, sa nodra i sasabai.

¹⁰Na vale nei Eroni, vakadinati Jiova, sa nona i vukevuke, sa nona i sasabai.

¹¹Oi kemudou sa rerevaka na Kalou, vakadinati Jiova, o Koya na nomuni vukevuke kei na nomuni sasabai.

¹²Sa dau nanumi keda o Jiova; Ena vakalouvinakataki keda; Ena vakalouvinakataki Isireli; Ena vakalouvinakataka na vale i Eroni.

¹³Ena vakalouvinakataki ira sa rerevaki Jiova, io, o ira na qase kei ira na gone.

¹⁴Me vakalewevuqataki kemuni o Jiova Oi kemuni kei ira na luvemuni.

¹⁵Me vakavinavinakataki kemuni o Jiova, o Koya sa bulia na lomalagi kei vuravura.

¹⁶Na lomalagi kei na lomalagi e cake sa nei Jiova, ia, na vuravura, sa solia vei ira na luve ni tamata.

¹⁷Na mate era na sega ni vakavinavinakataki Jiova, se dua sa lako vei ira na galu.

¹⁸Ia, Oi keda, eda na vakacaucautaki Jiova, mai na gauna oqo, ka yacova na gauna kecega. Me vakavinavinakataki o Jiova!