[19] Same 17

¹I Jiova, mo Ni rogoca e dua na ka dina ka dodonu oqo, mo Ni goleva mai na tagi oqo; Ni rogoca na masu oqo, ni sa sega ni lako mai na tebenigusu veivakaisini.

²Na noqu veivakadonui, me lako mai na kemuni serau; na matamuni me raica ga na ka sa dodonu sara.

³O Ni sa vakatovolea oti na yaloqu; o Ni sa dau sikovi au ena bogi; o Ni sa dikevi au oti ka sega ni kunea e dua na ka; au sa nakita oti me kua ni cala na gusuqu.

⁴Me vaka na cakacaka ni tamata, me vaka na vosa ni Gusumi, au sa maroroi au mai na nona sala na dauveivakarusai.

⁵Mo Ni vakadeitaka na noqu i kalawa ena Nomuni sala, me'u kakua ni sikalutu.

⁶Au a daukaci yani vei Kemuni, baleta, ni o ni dau vakarorogo mai, Noqu Kalou Ni rogoci au mai, mo Ni rogoca na ka au sa cavuta oti yani.

⁷Mo Ni vakaraitaka na Nomuni loloma vakaidina ena Ligamuni i matau, o Ni sa dauvakabulai ira sa vakararavi vei Kemuni, mai vei ira sa tu me ra veivala vata.

⁸Mo Ni maroroi au me vaka na loa ni mata; mo ni vunitaki au ena ruku ni tabamuni,

⁹Mai vei ira na tamata ca sa dauveivakasagai, mai vei ira na meca gaga sa dau vakavolivoliti au.

¹⁰E ra sa sogota oti na yalodra levulevu; na gusudra sa vosa vakadokadoka tiko.

¹¹Era sa tu oqo ena noqui kabakaba ni vale, sa vakararai tiko na matadra e vuravura,

¹²Sa vaka na laioni ena vanua vuni, sa vaka na laioni sa vakarau me basuraka na kena.

¹³Mo Ni tucake Jiova, me ra bolei, ka vakadavori, vakabulai au mai vei ira na tamata ca ena Nomuni i seleiwau,

¹⁴Na Ligamuni mai vei ira na tamata, I Jiova mai vei ira na liga ni tamata e vuravura, o ira sa vakaivotavota ena bula oqo, Na ketedra o Ni sa vakatawana ena Nomuni yau vuni. Era sa mamau ni ra sa vakagone, vei ira na gone dramidrami.

¹⁵Io, vei au, au sa raica na Matamuni ena yalododonu; Au na vakataucokotaki, ni'u sa yadra me'u vakataki kemuni.