[19] Same 18

¹Au na lomani Kemuni, Jiova, na Noqu kaukauwa.

²O Jiova na Noqu vatudei, na Noqu i drodro, na Noqu dauniveisereki, na Noqu Kalou, Noqu kaukauwa, sasabai, na davui ni noqu vakabulai, na Noqu bai kaukauwa.

³Au na kacivi Jiova, o Koya e dodonu me vakacaucautaki; au sa vakabulai, mai vei ira na kequ meca.

⁴Na gaga ni mate sa siviti au, sa vakarerei au, ni sa luvu mai na vakavuravura.

⁵Na rarawa kei Bulu sa vakavoliti au; na i cori ni mate sa bolei au.

⁶Ni'u sa vakayavalati, au sa qai kacivi Jiova, au sa kaci cake vua na Kalou; sa qai rogoci au mai na Nona vale Tabu, sa lako mai matana na noqu tagi, io, ki nadaligana.

⁷Sa qai uneune o vuravura, ka yavavala na yavu ni veidelana, ni sa cudru mai o Koya.

⁸Sa kubou mai na ucuna, sa bukawaqa mai na gusuna, sa caudre kina na koala.

⁹Sa lobika talega na lomalagi ka siro sobu mai ni sa tu, na butobuto sa tu ena ruku ni yavana.

¹⁰Sa vodo ena Jerupi, ka vuka, sa vuka yani ena ruku ni yavana.

¹¹Sa cakava o Koya na butobuto me Nona tikina vuni; na Nona i ubi na wai butobuto kei na o vavaku ni lomalagi.

¹²Mai na rarama sa tu e Matana, era sa takoso mai na Nona o vavaku kei na uca cevata kei na koala sa caudre tu.

¹³O Jiova sa kurukuru mai lomalagi, sa rorogo mai na domo i Koya sa cecere sara, na uca cevata kei na koala sa caudre tu.

¹⁴Sa tala yani na Nona gasau, ka vakasavi ira na meca. Sa levu mai na livaliva, sa qai vakayalia tale yani.

¹⁵Era sa basika mai nai davodavo ni wai ka ra laukune, na yavu kei vuravura sa vakaraitaki, e na Nomuni veivunauci Jiova, ena rorogo ni i cegu ni ucumuni.

¹⁶Sa talai mai cake, sa kauti au, sa kauti au tani mai na wai e vuqa.

¹⁷Sa vakabulai au mai vei ira na kequ meca kaukauwa, mai vei ira era cati au, ni ra sa kaukauwa cake vei au.

¹⁸Era sa vakaogai au ena siga ni noqu rarawa. Ia, o Jiova sa noqu i tokani.

¹⁹Sa kauti au mai ki na vanua rabailevu; sa vakabulai au ni sa rui taleitaki au.

²⁰Sa saumi au o Jiova me vaka na noqu yalododonu, me vaka na savasava ni ligaqu, sa savai au kina o Koya.

²¹Ni'u maroroya na sala i Jiova, ka sega ni lako tani vakaca mai vua na noqu Kalou.

²²Na nona lewa kecega sa tu e mataqu, na Nona i lesilesi kecega au sa sega ni biuta tani.

²³Sa sega na ka me'u beitaki kina mai Vua, au sa maroroi au mai na ca.

²⁴O koya oqo sa saumi au kina o Jiova, me vaka na savasava ni ligaqu e matana.

²⁵Vei ira na dauyalololoma, o ni na vakaraitaka na Nomuni yalololoma; vei ira na sega cala, o na vakaraitaka na Nomuni sega ni cala;

²⁶Vei ira na yalosavasava, o na vakaraitaka na Nomuni yalosavasava; vei ira na lawaki ca o ni na vakaraitaka na Nomuni Yalomatua.

²⁷O ni na vakabulai ira na yalomalumalumu, ka na vakarusa na viavia levu.

²⁸O ni na vakawaqaca na noqu cina, na Kalou o Jiova ena vakararamataka na noqu butobuto.

²⁹Ena Vukumuni, au na bolea kina na mataivalu, ena vuku ni noqu Kalou, au na ladeva kina na bai ni valu.

³⁰Ni sa Kalou ga o Jiova, sa taucoko ga na nona sala: na vosa i Jiova sa vakadinadinataki; o koya nai sasabai vei ira sa vakararavi vua.

³¹O cei sa Kalou" O Jiova duadua ga? O cei tale na Vatu Dina, o Jiova duadua ga?

³²Na Kalou ga sa vakayaragitaki au ena kaukauwa, ka sa cakava me taucoko na noqu i lakolako.

³³Sa cakava na yavaqu me vaka na yava ni me kila, ka sa vakatikori au ena vanua cecere.

³⁴Sa vakavulica na ligaqu me vala, na ligaqu sa rawa ni loveca na dakai titi varasa.

³⁵O ni sa solia talega vei au na i sasabai ni Nomuni veivakabulai; sa laveti au cake na Ligamuni i matau, na Nomuni yalovinaka sa vakaceceretaki au.

³⁶O ni sa vakarabailevutaka na noqu sala e mataqu, au na sega ni tidara kina.

³⁷Au sa cici ka sivi ira na kequ meca, au sa vakarusai ira kece, ka'u sa qai lesu tale.

³⁸Au sa vakamavoataki ira, me ra sa sega ni tucake rawa; era sa davo kecega e na ruku ni yavaqu.

³⁹Sai kemuni ga sa vakakaukauwataki au e nai valu; o ni sa vakamalumalutaki ira, sa tu, me veivorati kei au.

⁴⁰O ni sa solia talega vei au na domodra na kequ meca, au sa vakarusai ira sa cati au.

⁴¹Era sa kaci vakadomolevu, sa sega e dua me na vukei ira, na Kalou mada ga sa sega ni via rogoci ira.

⁴²Au sa vakadrukai ira, me vaka na kuvu ni soso e na cagi; au sa viviraki ira me vaka na duka ena sala.

⁴³O Ni sa vakabulai au mai na nodra veiqati na tamata, o ni sa cakava me'u ulu ni veimatanitu, era sa qaravi au o ira au sega ni kilai ira.

⁴⁴Era sa talairawarawa ga ni ra sa rogoci au; era sa cuva ga vei au na kai tani.

⁴⁵Era sa dro talega na kai tani, ka yali yani, Era sa rere vakalevu, ka dro mai na nodra i vunivuni.

⁴⁶Sa bula o Jiova! Me vakacaucautaki na noda Vatudei! Na Kalou, na noqu i Vakabula, me vakacerecerei.

⁴⁷Na Kalou ga sa vala ena vukuqu, ka vakamalumalutaka na tamata e yavaqu;

⁴⁸Sa vakabulai au mai vei ira na kequ meca, o Ni sa laveti au cake, mai vei ira sa tu me tuva i valu vei au; o Ni sa vakabulai au mai vei ira na dauveivakasaurarataki.

⁴⁹O koya oqo, au na vakavinavinaka tikoga kina vei Kemuni, Jiova, ena kedra maliwa na sega ni cili. Au na vakacerecerea na yacamuni.

⁵⁰Sa solia na veivakabulai levu vei koya na nona tui, sa cakava na loloma levu vei koya sa lumuta o Koya, Io, vei Tevita kei ira kece na nona kawa.