[19] Same 19

¹Na lomalagi sa tukuna na lagilagi ni Kalou; Na maliwa lala sa vakaraitaka na cakacaka ni Kalou.

²Na veisiga yadudua sa vosa tiko, na veibogi sa vakaraitaka na kila ka.

³Sa sega ni dua e vosa, se, na domo e rorogo.

⁴Na nodra i vakarau ga, sa lako yani ki vuravura taucoko, kei na nodra vosa ki nai yalayala kei vuravura. Sa cakava na ka buli oqo, me valenisoro ni matanisiga,

⁵Sa vaka na Tagane sa qai vakawati ni sa lako mai na nona loqi, ka sa reki me vaka na qaqa ni sa ciciva na cere.

⁶Sa vakatekivu na kena cadra mai na dua na yasa ni lomalagi, ia sa la'ki dromu sobu ki na yasana e dua tani; sa sega na ka e vuni rawa mai na kena katakata.

⁷Na i vakaro i Jiova sa dodonu sara, sa saumaka na yalo ni tamata me vinaka; nai tukutuku i Jiova sa tudei, sa veivakavukui;

⁸Na i lesilesi i Jiova, sa dina, sa vakarekitaka na yalo.

⁹Na rerevaki Jiova, sa savasava, sa tudei ka sega ni mudu; na lewa i Jiova, sa dina ka savasava taucoko.

¹⁰Me gadrevi vakalevu cake na vosa ni Kalou, mai na koula, io, na koula vinaka sara, sa kamikamica cake sara mai na oni, io mai na i soso oni.

¹¹Ena ka oqo, sa vakasalataki kina na Nomuni tamata, ia ni sa maroroya ena sautu kina.

¹²O cei ena kila rawa na nona cala? Mo ni vakasavasavataki au mai nai valavala ca kecega au vunitaka tu.

¹³Na nomuni tamata mai na garova nai valavala ca; ka me ra kakua vakatulewa vei au. Ia au sa na qai sega ni beitaki rawa, au sa na galala mai nai valavala ca kecega.

¹⁴Mo Ni vakatara na vosa ni gusuqu kei na vakanananu ni yaloqu, me ciqomi e Matamuni, I Jiova, na noqu Kaukauwa, na noqui Vakabula.