[19] Same 25

¹Kivei Kemuni Jiova, au sa laveta cake na yaloqu.

²Noqu Kalou; au sa vakadinati kemuni: me kua vei au na madua; me kua ni ra qaqa vei au na meca.

³E dina me kua ni dua e waraki kemuni me madua; me ra madua ga o ira sa daucaka ca.

⁴Jiova mo Ni vakaraitaka vei au na Nomuni sala, ka vakavulici au kina.

⁵Liutaki au ki na Nomuni dina ka vakavulici au kina. Ni sa i Kemuni na Kalou, na noqu i vakabula; Kemuni ga, au sa waraka tiko ena veisiga.

⁶I Jiova, mo ni nanuma na Nomuni yalololoma kei na Nomuni yalovinaka, ni sa ka mai liu sara.

⁷Mo ni guilecava na noqu i valavala ca, ni'u a se cauravou kina, se na noqu lako tani e Matamuni; me vaka na Nomuni yalololoma levu Ni nanumi au mai, I Jiova, me vakatalega na Nomuni yalovinaka.

⁸Na vinaka kei na dodonu sa nei Jiova; o Koya oqo sa vakavulici ira kina nai valavala ca o Koya, ena sala.

⁹O ira na yalomalumalumu sa tuberi ira ena lewa dodonu, sa vakavulici ira na yalomalua ena Nona sala.

¹⁰Na sala kecega i Jiova na yalololoma kei na dina, o koya oqori, au sa maroroya me noqu na veiyalayalati kei na Nona i tukutuku.

¹¹E na vuku ni Yacamuni, Jiova, Ni vosota na noqu cala, ni sa rui ka levu.

¹²O cei na tamata sa rerevaka na Kalou? Me vakavulici o koya ena sala sa digitaki.

¹³O koya ena tiko vinaka, na nona kawa era na taukena na vanua.

¹⁴Na ka vuni i Jiova, sa tu vei ira sa rerevaki Koya. Ia ena vakatakila vei ira o Koya na Nona veiyalayalati.

¹⁵Na mataqu sa rai tikoga vei Jiova, ni sai Koya ga ena kauti au tani mai na lawa sa veitarovi.

¹⁶Mo Ni vaka namata mai vei au Jiova, ka yalololoma mai, ni'u sa rui vakalolomataki.

¹⁷Sa levu ga mai na leqa ni yaloqu; Isa, Ni kauti au tani mai nai colacola oqo!

¹⁸Mo ni raica mada na rarawa kei na mosi oqo, ka vosota kece na noqu i valavala ca.

¹⁹Mo Ni raici ira na kequ meca, ni ra sa rui lewe vuqa; E ra sa rui cati au vakaukauwa sara.

²⁰Ni maroroya na yaloqu ka vakabulai au; me kua ni dua e vakamaduataki au, ni'u sa vakararavi vei Kemuni.

²¹Na dina kei na dodonu me rau maroroi au, ni'u sa waraki kemuni.

²²Me ra vakabulai na Isireli, na Kalou! Mai na nodra leqa kece!