[19] Same 56

¹Na kalou, me levu mai na Nomuni yalololoma vei au, ni ra sa via tilomi au na tamata; e na siga taucoko sa vala tiko mai ka vakasaurarataki au.

²Ena siga taucoko era sa vakasasataki au na kequ meca, sa lewe levu sa veivala kei au, oi Kemuni sa cecere sara.

³Au sa vakararavi vei Kemuni ena gauna kece e tarai au kina na rere.

⁴Ki vua ga na Kalou, au sa biuta kina na noqu vakararavi, au na sega ni rere. Na cava ena rawa ni cakava vei au na tamata?

⁵Ena siga taucoko, era sa moica na noqu vosa, Era sa vakananuma na ca baleti au.

⁶Era sa vakasoqoni ira, era sa vuni, era sa vaka raica na noqu I kalawa kece, ni ra sa no ka waraki au tiko.

⁷Era na dro bula beka ena vuku ni ka ca era bukia? Na Kalou, ena Nomuni cudru, me ra vakabalei na tamata oqo!

⁸O ni sa wilika na noqu lako voli; Na wai ni mataqu kece, o ni sa vakasoqona ena Nomuni tavaya; E ra sa tiko beka ena Nomuni i vola?

⁹Ni'u sa tagi vei kemuni, era na lesu tale na kequ meca; Oqo, au sa kila kina, ni sa tovaki au na Kalou.

¹⁰Ki vua na Kalou, (Au na vakacerecerea na Nona vosa), ki vei Jiova, (Au na vakacerecerea na Nona vosa),

¹¹Ki vua na Kalou, au sa biuta kina na noqu vakararavi, au na sega ni rere, na cava ena cakava rawa vei au na tamata?

¹²Na yalayala sa caka vei Kemuni sa vesuki au talega, na noqu Kalou; Au na vakacabora na veivakacerecerei vei Kemuni,

¹³O Ni sa vakabula na yaloqu, mai na mate. O Ni sa sega beka ni tarova na yavaqu me'u kua ni tacaqe, me'u lako voli kina ena mata ni noqu Kalou ena rarama ni bula?