[22] Sere I Solomoni 2

¹Oi au na rosi ni Saroni, Na viavia ni buca. Na Daulomani

²Me vaka na viavia ena kedra maliwa na soni Sa vakakina o koya ka'u sa lomana ena kedra maliwa na goneyalewa. Na Sulamaiti

³Me vaka na vu ni apolo ena kedra maliwa na veikau, sa vakakina na noqu daulomani e na kedra maliwa na cauravou. Au sa dabe sobu ena vanua rurugu ena reki vakaidina. Na vuana sa kamikamica ki na yamequ.

⁴Sa kauti au mai o koya ki na vale ni magiti, sa ukutaki ga kina na veilomani.

⁵Maroroi au vata na i soso vuata, vakavoui au vata na apolo, ni'u sa tagica na loloma.

⁶Sa vakalokoloko na uluqu ena ligana i mawi, na ligana i matau sa mokoti au.

⁷Au sa vakarota veikemudou na goneyalewa ni Jerusalemi, Me vaka na me kila ni vanua, dou kua ni yavalata, se vakayadrata, sa na basika ga mai. Na Sulamaiti

⁸Na domo i koya ka'u sa lomana! Sa lako mai o koya, sa ladeva mai na veitokaitua, sa ciciva mai na veidelana.

⁹Na noqu daulomani sa vaka na me kila, sa vaka na teira gonetagane, sa tu cake tu mai na lalaga ni vale; sa vakararai tiko mai ena katuba leka, ka sa vakairoiro tiko mai.

¹⁰Sa vosa mai na noqu daulomani, ka sa tukuna, "Mo tucake mai na noqu ka lomani, na mata vinaka, lako tani mai.

¹¹Sa oti na vula i batabata Sa oti na uca, sa cila mai na siga.

¹²Era sa basika mai na veisenikau ni vanua, Oqo sa gauna ni lagalaga sere, Na domo ni ruve sa rogo mai ena noda vanua.

¹³Na vuni lolo era sa solia mai na kedra drokadroka dina, na veivaini era sa solia mai na veivua ni vaini vinaka, solia mai nai boi vinaka. Mo tucake, na noqu ka lomani, ka mata vinaka, Mo lako tani mai!

¹⁴"Na noqu ruve, ena laqa ni veivatu, Ena vanua vuni ni barivatu, Me'u raica ga na nomu matavinaka, Me'u rogoca ga na domomu, Ni sa rui kamica na domomu ka sa rui ka Domoni na matamu rairai vinaka."

¹⁵Vesuka mai na fokisi, Na fokisi lalai sa vakacacana na were ni vaini, ni sa tekivu vua mai na vaini. Na Sulamaiti

¹⁶Na noqu daulomani sa noqu, Oi au sa nona. Sa vakani ira na nona qele ni sipi ena kedra maliwa na viavia.

¹⁷Me yacova na kida ni mataka Sa dro yani nai yaloyalo vuki mai na noqu ka lomani Mo vaka na me kila kei na teira gonetagane ena veiulunivanua o Peca.