Sálmarnir 59

¹Frelsa mig frá óvinum mínum, Guð minn, bjarga mér frá fjendum mínum.

²(59:3) Frelsa mig frá illgjörðamönnunum og hjálpa mér gegn morðingjunum,

³(59:4) því sjá, þeir sitja um líf mitt, hinir sterku áreita mig, þótt ég hafi ekki brotið eða syndgað, Drottinn.

⁴(59:5) Þótt ég hafi eigi misgjört, hlaupa þeir að og búast til áhlaups. Vakna þú mér til liðveislu og lít á!

⁵(59:6) En þú, Drottinn, Guð hersveitanna, Ísraels Guð, vakna þú til þess að vitja allra þjóðanna, þyrm eigi neinum fráhverfum syndara. [Sela]

⁶(59:7) Á hverju kvöldi koma þeir aftur, ýlfra eins og hundar og sveima um borgina.

⁷(59:8) Sjá, það freyðir úr munni þeirra, sverð eru á vörum þeirra, því að - "Hver heyrir?"

⁸(59:9) En þú, Drottinn, hlærð að þeim, þú gjörir gys að öllum þjóðunum.

⁹(59:10) Vígi mitt, um þig vil ég kveða, því að Guð er háborg mín.

¹⁰(59:11) Guð kemur í móti mér með náð sinni, Guð lætur mig sjá óvini mína auðmýkta.

¹¹(59:12) Drep þá eigi, svo að lýður minn gleymi eigi, lát þá reika fyrir veldi þínu og steyp þeim af stóli, þú Drottinn, skjöldur vor,

¹²(59:13) sakir syndar munns þeirra, orðsins af vörum þeirra, og lát þá verða veidda í hroka þeirra, og sakir formælinga þeirra og lygi, er þeir tala.

¹³(59:14) Afmá þá í reiði, afmá þá, uns þeir eru eigi framar til, og lát þá kenna á því, að Guð ríkir yfir Jakobsætt, allt til endimarka jarðar. [Sela]

¹⁴(59:15) Á hverju kveldi koma þeir aftur, ýlfra eins og hundar og sveima um borgina.

¹⁵(59:16) Þeir reika um eftir æti og urra, ef þeir verða eigi saddir.

¹⁶(59:17) En ég vil kveða um mátt þinn og fagna yfir náð þinni á hverjum morgni, því a�� þú hefir gjörst háborg mín og athvarf á degi neyðar minnar.

¹⁷(59:18) Vígi mitt, um þig vil ég kveða, því að Guð er háborg mín, minn miskunnsami Guð.