Sálmarnir 83

¹Guð, ver eigi hljóður, ver eigi þögull og hald eigi kyrru fyrir, ó Guð!

²(83:3) Því sjá, óvinir þínir gjöra hark, og hatursmenn þínir hefja höfuðið,

³(83:4) þeir bregða á slæg ráð gegn lýð þínum, bera ráð sín saman gegn þeim er þú geymir.

⁴(83:5) Þeir segja: "Komið, látum oss uppræta þá, svo að þeir séu ekki þjóð framar, og nafns Ísraels verði eigi framar minnst!"

⁵(83:6) Því að þeir hafa einhuga borið saman ráð sín, gegn þér hafa þeir gjört bandalag:

⁶(83:7) Edómtjöld og Ísmaelítar, Móab og Hagrítar,

⁷(83:8) Gebal, Ammon og Amalek, Filistea ásamt Týrusbúum.

⁸(83:9) Assúr hefir einnig gjört bandalag við þá og ljær armlegg sinn Lots-sonum. [Sela]

⁹(83:10) Far með þá eins og Midían, eins og Sísera, eins og Jabín við Kísonlæk,

¹⁰(83:11) þeim var útrýmt hjá Endór, urðu að áburði á jörðina.

¹¹(83:12) Gjör þá, göfugmenni þeirra, eins og Óreb og Seeb, og alla höfðingja þeirra eins og Seba og Salmúna,

¹²(83:13) þá er sögðu: "Vér viljum kasta eign vorri á vengi Guðs."

¹³(83:14) Guð vor, gjör þá sem rykmökk, sem hálmleggi fyrir vindi.

¹⁴(83:15) Eins og eldur, sem brennir skóginn, eins og logi, sem bálast upp um fjöllin,

¹⁵(83:16) svo skalt þú elta þá með ofviðri þínu, skelfa þá með fellibyl þínum.

¹⁶(83:17) Lát andlit þeirra fyllast sneypu, að þeir megi leita nafns þíns, Drottinn!

¹⁷(83:18) Lát þá verða til skammar og skelfast um aldur, lát þá sæta háðung og tortímast,

¹⁸(83:19) að þeir megi komast að raun um, að þú einn heitir Drottinn, Hinn hæsti yfir allri jörðunni.