Забур жырлары 21

¹Уа, Ием, құдіретіңе патша қуанады, Құтқарғаныңа шексіз шаттанады.

²Оған жүрегінің қалауын сыйладың, Сұраған тілектеріне�� бас тартпадың.

³Игіліктер сыйлап оны қарсы алдың, Саф алтыннан басына тәж кигіздің.

⁴Өмірін сақтауды сұрағанда Өзіңнен Тіпті мәңгілік өмір сыйладың Сен.

⁵Жеңіс беріп оны даңққа бөледің, Абырой мен салтанатқа кенелттің.

⁶Сен патшаны мәңгілік жарылқадың, Қасыңда болу қуанышын сыйладың.

⁷Себебі патша Жаратқанға сенім артады, Хақ Тағаланың рақымымен нық тұрады.

⁸Өзіңді жек көргенді іздеп табасың, Бар жауыңды күшпен ұстап аласың,

⁹Келгеніңде отты пешке тастайсың, Уа, Ием, қаһарыңмен талқандайсың, Оттың жалынымен түгел жалмайсың.

¹⁰Жау ұрпақтарын жер бетінен құртасың, Адамзат арасынан жоқ қыласың.

¹¹Олар саған қарсы қастандық ойлайды, Алайда соны орындай алмайды.

¹²Жебе тартып беттерін нысана етсең, Оларды кері қайтуға мәжбүрлейсің.

¹³Уа, Ием, көтеріле гөр құдіретіңмен, Күш-қуатыңды даңқтаймыз ән-күйменен.