Забур жырлары 38

¹Уа, Жаратқан, қаһарланып сөге көрме, Ашуланып мені жазалай көрме.

²Өзің атқан жебелерің денеме кірді, Қолың зі��дей басты менің үстімді.

³Қаһарыңнан денемде сау жерім жоқ, Күнәмнан жан-тәнімде тыныштық жоқ.

⁴Істеген күнәларым басымнан асты, Ауыр жүктей денемді жерге жанышты.

⁵Ақымақ істерімнің кесірінен Жараларым іріңдеп, иістенген,

⁶Иіліп кеттім тұла бойым бүгіліп, Күні бойы жүремін қайғы шегіп.

⁷Белім менің ісіп кетіп қабынған, Денемде сау жерім жоқ ауырмаған.

⁸Әбден әлсіреп, шалдығып-шаршаймын, Жан азабынан қатты ыңқылдаймын.

⁹Уа, Ием, Саған аян барлық қалауым, Құпия емес Саған ыңқылдауым,

¹⁰Жүрегім аласұрып, құрыды қуатым, Көз жанарым суалып, қашты нұрым.

¹¹Дос-жарандарым жарамнан қашқақтап, Жақын туыстарым да тұр алшақтап.

¹²Жанымды алмақ жаулар тұзақ құрады, Дұшпандар ажалым туралы айтады, Күн сайын қастық жайлы ақылдасады.

¹³Ал мен саңыраудай құлақ аспаймын, Мылқау сияқты жағымды ашпаймын,

¹⁴Осылай құлағы естімес адамдаймын, Аузынан жауап шықпас мылқаудаймын.

¹⁵Өйткені, Жаратқан Ие, Өзіңе сенем, Сен жауап бересің, уа, Құдай Ием.

¹⁶Сонда мен былай деп ойлаған едім: Дұшпандарым мені табаламасын, Сүрініп құласам, олар паңданбасын.

¹⁷Себебі жақын қалдым мен құлауға, Азабым әрдайым көз алдымда.

¹⁸Әділетсіз ісімді мойындаймын, Жасаған күнәма қайғырудамын.

¹⁹Ал көп жауларым сергек жүріп күшеюде, Себепсіз мені жек көретіндер көбеюде,

²⁰Жақсылығыма олар жамандық қайырады, Ізгі жолмен жүргеніме қарсы шығады.

²¹Уа, Ием, мені жалғыз тастай көрме, О, Құдайым, менен алыстай көрме.

²²Асыға гөр маған көмек беруге, Құтқарушым менің, уа, Жаратқан Ие.