Забур жырлары 46

¹Құдай — біздің панамыз да күшіміз, Қиын кезде сенімді көмекшіміз.

²Сол себептен біз уайымдап қорықпаймыз, Тіпті дүниенің астан-кестені шықса да, Таулар теңіздің тұңғиығына құласа да,

³Теңіз долдана ақ көбік атқыласа да, Оның толқынынан тау сілкініп жатса да. (Әлемнің Иесі біздің жанымызда, Жақып сиынған Құдай — биік қорғанымыз да!)

⁴Құдайдың таңдап алған қаласына, Алла Тағаланың киелі тұрағына Оның рақымы бұлақтың суындай Әрқашан да нәр беріп қуантуда.

⁵Құдай осы қаланың ортасында, Ешқашан қозғалмайды да сол қала, Құдай көмегін береді таң ата.

⁶Халықтар абыржи толқып, Патшалардың тақтары шайқалады, Алла Тағаланың үні естіліп, Бүкіл жер беті балқып жоқ болады.

⁷Әлемнің Иесі біздің жанымызда, Жақып сиынған Құдай — биік қорғанымыз да!

⁸Келіп көріңдер Иенің істерін, Ол ойрандатты жаулардың жерлерін,

⁹Дүниедегі соғыстарды тоқтатып, Садақ, найза атаулыны сындырып, Күймелерді қиратты отқа жағып.

¹⁰«Тынышталыңдар барлығың енді, Біліңдер Менің Құдай екенімді! Басқа халықтар Мені құрметтейді, Дүние жүзінде Мені қастерлейді».

¹¹Әлемнің Иесі біздің жанымызда, Жақып сиынған Құдай — биік қорғанымыз да!