Забур жырлары 48

¹Құдайдың таңдап алған қаласында, Оның қасиетті Сион тауында Жаратқан Иеміз теңдессіз ұлы, Ол мадақталуға әбден лайықты!

²Әсем де биік Сион тауы — Күллі әлемнің қуанышы, Таудың солтүстік жағындағы Ұлы Патшаның астанасы.

³Бекіністі сарайларында Құдай Белгілі қорғаушы, баспанадай.

⁴Патшалар күштерін жинаған еді, Шайқасқа бірігіп аттанған еді.

⁵Олар қаланы көріп, аң-таң болды, Үрейленіп, түгел қаша жөнелді,

⁶Бойларын қорқыныш кернеді, Толғатқан әйелдей қиналды.

⁷Теңіз кемелерін шығыстың дауылы Қиратқандай, құрттың Сен оларды.

⁸Құлағымызбен мынаны естіген едік, Әлем Иесінің қаласынан соны көрдік, Иә, Құдайымыздың осы шаһарынан: Өз қаласын нығайтады Ол әрқашан.

⁹Уа, Құдай, ғибадатханаңда Ойландық мейірімің жайында,

¹⁰Уа, Құдайым, Сенің атың да, Саған арналған мадақтау да Жердің төрт бұрышына жайылады, Құдіретті қолың әділдік орнатады.

¹¹Сенің әділ билігіңе бола Шаттанады Сион тауы да, Қуанады Яһуда қалалары да.

¹²Сионға жақындап барыңдар, Шаһарды айналып шығыңдар, Барлық мұнараларын санаңдар,

¹³Қамалдарына назар аударыңдар, Сарайларын да қарап шығыңдар. Келер ұрпаққа мынаны айтыңдар:

¹⁴«Бұл Құдай — мәңгілік Құдайымыз, Деміміз біткенше Ол — жетекшіміз!»