Забур жырлары 55

¹Уа, Құдай, мінажатыма құлақ түрші, Өтінішімді елемей жүрмеші.

²Наз��р аударып, жауап берші маған, Аһ ұрып, абыржып жүрмін қайғыдан,

³Дұшпандарымның қатты дауысынан Әрі әділетсіздердің қыспағынан. Олар басыма азап жаудырады, Ашулана жала да жабады.

⁴Жүрегім қинала дірілдейді, Өлімнің қорқынышы тап береді.

⁵Үрей мен қалтырау басып алады, Қорқыныш билейді тұла бойымды.

⁶Сонда мен тілек тілеп былай дедім: «Кептердің қанаттарын маған берер кім, Бұл жерден ұшып кетіп, тыншыр едім,

⁷Алысқа ұшып, айдалада қалар едім,

⁸Қастықтың дауылынан тез құтылар едім».

⁹Уа, Ием, зұлымдарды абыржытып, Берекесін алшы тілдерін шатастырып, Қаладан зорлық-зомбылық тұрмын көріп.

¹⁰Күні-түні олар қамалда аңдып жүреді, Сұмдық пен пәлеге толы қала іші,

¹¹Тонаушылық пен өлім мол шаһарда, Жалғандық пен зорлық бітпес базарда.

¹²Жауым қараласа соған төзер едім, Дұшпаным бас көтерсе одан тығылар едім.

¹³Алайда мұны істеген қатарласым Сенсің, о, жаныма жақын сырлас досым!

¹⁴Қандай ғажап еді қарым-қатынасымыз, Құдайдың үйіне бірге барғанымыз.

¹⁵Кенеттен жетсін ажал жауларыма, Тірідей түссін олар тұңғиыққа, Зұлымдық мекендейді ғой араларында.

¹⁶Ал мен Құдайды көмекке шақырамын, Сонда мені құтқарады Жаратқаным.

¹⁷Ертеңгісін, тал түсте және кешқұрым Құдайыма дауыстап жалбарынамын, Оның құлағына шалынады дауысым.

¹⁸Маған қарсы шығып, шайқасқан көп жаудан Құдай жанымды сақтап алады аман.

¹⁹Ежелден Құдай тағында отырып келеді, Мені естіп, жауды Өзіне бас игізеді. Олар іс-әрекеттерін өзгертпей келді, Құдайдан қорқып, Оны қастерлемей жүрді.

²⁰Дұшпаным жасасқан келісімінен бас тартты, Өзімен тату тұрғандарға қарсы шықты,

²¹Сарымайдан да жұмсақ айтқан сөздері, Бірақ қастандыққа толы оның жүрегі, Иісмайдан да жағымды айтқандары, Шынымен жалаң семсердей астарлары.

²²Жаратқан Иеге арт бар уайымыңды, Ол сені қолдап, ойлайды қамыңды, Мәңгілік құлатпайды әділ жанды.

²³Алайда, уа, Құдайым, сол сұмдарды Тастайсың Сен тұңғиық шыңырауға, Қанішер жауыздардың жандары Құриды жетпей-ақ жасының жартысына. Ал мен болсам сенемін Жаратушыма.