Забур жырлары 59

¹Уа, Құдайым, құтқара гөр жаулары��нан, Мені сақтай гөр қарсыластарымнан,

²Арашалашы әділетсіздерден, Аман сақташы қанішерлерден.

³Уа, Жаратқан Ие, олар мені аңдуда, Маған қарсы мықтылар жиналуда. Ал не қылмысым, не күнәм болмай тұр,

⁴Еш кінәм жоқ, бірақ олар асығып жүр, Маған қарсы аттануға дайын тұр. Мені қорғап-қолдауға орныңнан тұршы, Мүшкіл жағдайыма көз сала көрші.

⁵Уа, Жаратушы Құдай, Әлемнің Иесі, Исраил халқының сиынатын Тәңірі, Енді көктегі тағыңнан көтерілші, Өзіңе бағынбайтын ұлттарға тап берші, Зұлым опасыздарға рақым көрсетпеші.

⁶Дұшпандарым кешқұрым кері қайтады, Қаланы аралап иттерше ұлысады.

⁷Ауыздарынан жамандық бұрқырайды, Тілдері семсердей жарақаттайды, Олар «Кім естір екен?» деп ойлайды.

⁸Ал Сен, Жаратқан Ие, оларға күлесің, Барлық қыңыр ұлттарды келекелейсің.

⁹Сен менің күш-қуатымның қайнарысың, Назарымды Өзіңе аударамын, Себебі, уа, Құдай, Сен қорғанымсың,

¹⁰Маған мейірім танытатын Құдайымсың, О, Құдай, алдымнан жүріп күш бересің, Жауларымның жеңілісін көрсетесің.

¹¹Оларды құртпашы, халқым ұмытпасын, Күшпен таратшы, Өзіңе бой ұрсын, Уа, Иеміз, қалқандай Қорғаушымызсың!

¹²Күнә — айтқандарының барлығы да, Ауыздарынан шыққан — қарғыс пен жала, Менмендіктерімен құласын тұзаққа!

¹³Қаһарыңмен оларды құртып таста, Жоқ қыла гөр оларды біржолата, Сонда «Жақыпқа Құдай билік жүргізеді» Деп жер түкпіріндегілер де біледі.

¹⁴Дұшпандарым кешқұрым кері қайтады, Қаланы аралап иттерше ұлысады,

¹⁵Жейтін олжа іздеп айнала шарлайды, Егер тоймаса түнде ырылдайды.

¹⁶Ал Сен пәлеге ұшырағанымда Маған болдың қорған және баспана, Сондықтан әнге салып құдіретіңді, Таңертеңнен паш етем мейіріміңді.

¹⁷Сен менің күш-қуатымның қайнарысың, Өзіңе мадақтау жырымды арнаймын. Себебі, уа, Құдай, Сен қорғанымсың, Мейірімін төгетін Құдайымсың.