Забур жырлары 68

¹Құдай көтеріліп, жауларын шашыратсын, Оны жек көретіндер алдынан қашсын.

²Түтіннің желмен ыдырайтыны сияқты, Уа, Құдайым, жауларыңды ыдыратшы, Балауыздың отқа еритіні іспетті, Зұлымдарды алдыңнан құртып жіберші.

³Бірақ әділдер болса, шаттана ән-салсын, Құдай алдында күліп мәз-мейрам болсын.

⁴Біздің Құдайымызға ән айтыңдар, Оның есімін дәріптеп жырлаңдар, Бұлттармен жүретін Оны мадақтаңдар, Жаратқан Ие — Оның аты, біліп алыңдар, Көз алдында шат-шадыман болыңдар.

⁵Құдай әке болады жетімдерге, Қорғаушы болады жесірлерге, Тағында отыр Ол киелі мекенінде,

⁶Жалғыз жандарға жанұя сыйлайды, Тұтқынды босатып, шаттыққа бөлейді, Ал қыңырды қапырық шөлге тастайды.

⁷О, Құдай, халқыңды Мысырдан бастап шыққанда, Айдалада оны ертіп жүріп отырғаныңда,

⁸Жер сілкініп, аспаннан жаңбыр қатты құйылды, Уа, Құдай, көз алдыңда Синай тауында, Исраил сиынған Өзіңнің алдыңда.

⁹Уәделі еліңе, я, Құдай, нөсер жаудырдың, Кеуіп қалған жерді қайтадан жандандырдың,

¹⁰Рақыммен халқыңды елде қоныстандырдың, Уа, Тәңірім, сол кедейлерді Сен қамқорладың.

¹¹Жаратқан Ие мынаған бұйрық шығарды, Көптеген қыз-келіншек оны хабарлады:

¹²Жау әскері басшыларымен қашып кетеді, Ауылдағы әйел заты олжаны бөліседі,

¹³Мал бағып қораларында қонған солар Күміс оранып кептер қанатына ұқсар, Алтын әшекей тағып, мамықтай құлпырар.

¹⁴Құдіретті Құдай патшаларды шашыратты, Салмон тауында соққан ақ боранға ұқсатты.

¹⁵Құдай жаратқан керемет — Башан тауы, Шыңдары заңғар биік — Башан тауы.

¹⁶Зәулім шыңдар, қызғанасыңдар не үшін Құдай тұруға таңдап алған Сион тауын, Жаратқан Иенің мәңгі мекендейтін тауын?

¹⁷Құдайдың күймелері сан мыңдаған, Араларында Иеміз шайқасқа аттанған, Киелі үйіне көшіп келді Синайдан.

¹⁸Сен заңғар биікке көтерілдің, Көптеген тұтқындарды ертіп жүрдің, Адамдардан тартулар қабылдадың, Бас көтергендерден де сыйлықтар алдың, Құдай Иенің мұнда тұруы үшін.

¹⁹Әрдайым Иеміз мадақталсын, Құтқарушы Құдайымыз даңқталсын: Жүгімізді көтеріп жүр Ол күн сайын, Құдайдың Өзі — бізді аман сақтайтын.

²⁰Құдайымыз бізді қорғап-қолдайды, Жаратушы Тәңір Ие ажалдан сақтайды.

²¹Құдай жауларының басын талқандайды, Соғысқұмар, қыңыр қылмыстыларды жояды.

²²Сол жауыздар жайлы Иеміз былай деген: «Оларды Башан тауынан да алып келем, Теңіздің ар жағынан да қайтарып әкелем.

²³Сонда аяқтарың жаудың қанын басады, Әрі иттерің қанды жалап тойынады».

²⁴Уа, Құдай, Сенің салтанатты шеруің, Киелі тұрағыңа Сенің кіруің Көрінеді бар жұртқа, о, Патшам, Құдайым.

²⁵Әншілер жүр алдында, аспапшылар соңында, Даңғыра ойнаған қыздар араларында:

²⁶«Жиындарда Құдайымызды мадақтаңдар, Исраилдің ұрпақтары, Иемізді даңқтаңдар!»

²⁷Кенже Бунямин руы бастап келеді, Яһуда басшыларының тобы ереді, Забулон, Нафталим басшылары да жүреді.

²⁸Уа, Құдай, күш-қуатыңды жинашы, Бұрын көрсеткен құдіретіңді танытшы,

²⁹Иерусалимдегі ғибадатханаңа бола Патшалар Саған сый-тарту әкеледі сонда.

³⁰Жау халықтарды сөгіп жуасытшы: Перғауын — қамыстағы хайуан сияқты, Ал бұзаудай күшсіз ұлттар арасындағы Бұқалар табынындай — оның әміршілері, Олар күмістен салық талап етеді. Соғысқұмар ұлттарды тарқатып жіберші!

³¹Мысырдан жіберілген мырзалар келеді, Құш елі де қол созып Құдайға көнеді.

³²Жердегі патшалықтар, Құдайға ән салыңдар, Иемізді мадақтап ән-жыр айтыңдар,

³³Дәріптеп ежелден аспанда жүрген Иемізді, Тыңда, зор даусымен Ол күркірейді.

³⁵Құдай киелі үйінде үрей туғызады, Исраилдің Құдайы халқын нығайтады. Лайым Құдай мадақтала берсін!